मुंबई- माजी गृहमंत्री अनिल देशमुख यांचा कोठडीतील मुक्काम वाढला आहे. अनिल देशमुख यांना 11 एप्रिलपर्यंत सीबीआय कोठडी देण्यात आली आहे. मनी लाँड्रिंग प्रकरणात सध्या अनिल देशमुख कोठडीत आहेत.
गेल्या आठवड्यात मुंबई सत्र न्यायालयातील विशेष सीबीआय कोर्टाने दरमहा 100 कोटींच्या वसूली प्रकरणी सचिन वाझे, संजीव पालांडे, कुंदन शिंदे आणि अनिल देशमुख या चौघांचा ताबा घेण्याची परवानगी तपास यंत्रणेला दिली होती. त्यानुसार सीबीआयने सचिन वाझेसह पालांडे आणि शिंदे या देशमुखांच्या दोन सहाय्यकांना सोमवारी (4 एप्रिल) सीबीआयकडून अटक करण्यात आली.
अटकेनंतर या तिघांनाही मुंबई सत्र न्यायालयातील विशेष सीबीआय कोर्टापुढे हजर केलं असता कोर्टाने या तिघांना सात दिवसांची सीबीआय कोठडी मंजूर केली. मात्र या प्रकरणातील मुख्य आरोपी अनिल देशमुख अचानक दोन दिवसांपूर्वी आर्थर रोड कारागृहातील स्वच्छतागृहात घसरून पडल्याने त्यांच्या खांद्याला दुखापत झाली. कारागृह प्रशासनाने त्यांची जे. जे. रुग्णालयात तपासणी केली. त्यानंतर त्यांना जे जे रुग्णालयात उपचारासाठी दाखल करण्यात आले होते. त्यामुळे सीबीआय त्यांचा ताबा घेऊ शकली नाही.
मंगळवारी (5 एप्रिल) देशमुखांना डिस्चार्ज दिल्याने सीबीआय ताबा घेण्याआधीच देशमुखांनी त्याविरोधात हायकोर्टाचे दरवाजे ठोठावले होते. परंतु या याचिकेवरील सुनावणीआधीच सीबीआयने आर्थर रोड तुरुंगातून अनिल देशमुख यांना ताब्यात घेतले. आज त्यांना न्यायालयासमोर हजर केले असता त्यांना
11 एप्रिलपर्यंत CBI कोठडी देण्यात आली आहे.
