बारामती: राज्याचे उपमुख्यमंत्री अजित पवार (Ajit Pawar) यांच्या हस्ते आज बारामती तालुक्यातील माळेगाव सहकारी साखर कारखान्याचा गळीत हंगामाचा शुभारंभ होणार होता. मात्र मराठा आरक्षणाच्या पार्श्वभूमीवर कारखान्याच्या कार्यक्रमाला कोणत्याही राजकीय व्यक्तीने उपस्थित राहण्यावर मराठा समाजाकडून आक्षेप घेण्यात आला आहे. त्यानुसार आज कारखाना परिसरात आंदोलक एकवटले आहेत या सर्व पार्श्वभूमीवर उपमुख्यमंत्री अजित पवार यांनी मोठा निर्णय घेत हा नियोजित दौरा रद्द केला आहे.
कारखाना परिसरातील शेतकरी पुतळ्याजवळ आंदोलक एकवटले असून आरक्षणाच्या समर्थनात घोषणाबाजी सुरू आहे. ‘जरांगे पाटील आगे बढो हम तुम्हारे साथ है… एक मराठा लाख मराठा.. ‘आरक्षणाच्या आमच्या हक्काचे. ‘नाही कुणाच्या बापाच.. एक मिशन मराठा आरक्षण..’ या मजकुराचे फलक घेऊन मराठा आंदोलक आंदोलन स्थळी जोरदार घोषणाबाजी करत आहे. यामुळे कारखाना परिसरात मोठ्या प्रमाणात पोलीस बंदोबस्त तैनात करण्यात आला आहे.
उपमुख्यमंत्री अजित पवार कारखान्याच्या गळीत हंगामाच्या कार्यक्रमाला येणार की नाही याकडे सर्वांचे लक्ष लागून राहिले होते. मात्र कार्यक्रमास्थळी मराठा समाजाकडून आंदोलन होत असल्याच्या पार्श्वभूमीवर उपमुख्यमंत्री अजित पवार हे कारखान्यातील सदर कार्यक्रमाला उपस्थित राहणार नसल्याचे समजत आहे.