नवी दिल्ली- जेंव्हा अननोन नंबरवरून कॉल आला की तुमच्या स्क्रीनवर फक्त त्याचा नंबर दिसतो. त्यामुळे फेक कॉल करणाऱ्यांचे चांगलेच फावते. मात्र आता कोणीही अनोळखी व्यक्तीने तुम्हाला फोन केला तरीही त्याचे नाव स्क्रीनवर झळकणार आहे. याबाबत भारतीय दूरसंचार विनियामक प्राधिकरण (ट्राय) नवे तंत्रज्ञान विकसित करण्याचा विचार करीत आहे.
ट्राय लवकरच फोन स्क्रीनवर कॉलर्सची KYC Based नावे फ्लॅश करण्यासाठी एक यंत्रणा तयार करण्याचे काम सुरू करणार आहे. ट्रायचे हे तंत्रज्ञान विकसित झाल्यानंतर तुम्हाला फोनवर युजर्सचे KYC नाव देखील दिसेल. नवे तंत्रज्ञान तयार करण्याकरिता येत्या दोन महिन्यांत हालचाली सुरू करण्यात येतील.
ही नवीन केवायसी आधारित प्रक्रिया दूरसंचार विभागाच्या नियमांनुसार असेल. KYC आधारित प्रक्रिया कॉलर्सना त्यांच्या KYC नुसार ओळखण्यात मदत करेल. या प्रक्रियेत दूरसंचार कंपन्यांना सर्व ग्राहकांचे अधिकृत नाव, KYC नावाने पत्ता प्रविष्ट करावा लागेल. याशिवाय, मतदार ओळखपत्र, वाहन चालविण्याचा परवाना किंवा वीजबिलाची पावती कागदपत्र म्हणून द्यावी लागणार आहे. त्यामुळे फसवणूक होण्याची शक्यता खूपच कमी होईल. नवीन KYC आधारित प्रक्रिया लागू झाल्यानंतर कॉलर आपली ओळख लपवू शकणार नाही.
याबाबत बोलताना ट्रायचे अध्यक्ष पी. डी. वाघेला म्हणाले, ” हे तंत्रज्ञान विकसित करण्याची सूचना केंद्रीय दूरसंचार खात्याकडून आम्हाला करण्यात आली होती, दूरसंचार खात्याने आखून दिलेल्या नियमांच्या कक्षेत राहून तसेच दूरसंचार कंपन्यांनी नोंदविलेल्या केवायसीचा आधार घेऊन नवे तंत्रज्ञान विकसित करण्यात येईल. दूरध्वनी करणाऱ्यांची नावे मोबाइलच्या स्क्रीनवर दर्शविणाऱ्या काही ॲपपेक्षा ट्रायचे नवे तंत्रज्ञान अधिक उत्तम व पारदर्शक असेल. ट्रायच्या नवीन तंत्रज्ञानाचा वापर करणे स्वत:च्या मर्जीवर अवलंबून असेल की, सर्वांनाच त्याचा वापर करावा लागेल याबाबत अद्याप निर्णय झालेला नाही अशी माहिती वाघेला यांनी दिली.
