इंदूर- खासगी बसमध्ये माय -लेकराचा संशयास्पद परिस्थितीत गुदमरून दुर्दैवी मृत्यू झाल्याची घटना घडली आहे. ही घटना पुण्याहून उज्जैनला जाणाऱ्या बसमध्ये घडली आहे.
दीपिका संदीप पटेल ( 38 वर्षे ) आणि आदित्यराज ( 11 वर्षे ) अशी या घटनेत मृत्युमुखी पडलेल्या माय लेकरांची नावे आहेत.
याबाबतची माहिती अशी की, दीपिका पटेल या आपला मुलगा आदित्यराज आणि आई पुष्पा यांच्यासोबत अशोक ट्रॅव्हल्सच्या एसी बसने ( MP07 – P – 5097) पुण्याहून उज्जेनला निघाल्या होत्या. दोघांनीही बसमध्ये गुदमरायला होत असल्याची तक्रार केली मात्र, गॅसचा वास येत असल्याचे सांगून कंडक्टरने लक्ष दिले नाही. मात्र इंदूरला पोहोचेपर्यंत दीपिका आणि तिचा मुलगा आदित्य यांची प्रकृती ढासळू लागली.
त्यांची तब्येत बिघडल्यावर कंडक्टरने दोघांनाही इंदूरच्या मध्यभागी खाली सोडले आणि ऑटोमधून होस्पिटलमध्ये पाठवले. त्याठिकाणी दोघांचा मृत्यू झाला.
शवविच्छेदनाचा अहवाल आल्यानंतरच त्यांच्या मृत्यूचे नेमके कारण समोर येईल. बसमध्ये लावलेल्या अग्निशामक यंत्रातून गॅस गळती झाल्याने ही घटना घडल्याचे कुटुंबीयांचे म्हणणे आहे.
ट्रॅव्हल्स संचालक राजेश शर्मा यांनी सांगितले की , महिलेने तब्येत बिघडल्याची तक्रार केली होती . बसमध्ये इतर 30 प्रवासीही प्रवास करत होते . यापैकी कोणाचीही प्रकृती बिघडलेली नाही . महिलेनंतर तिच्या मुलालाही उलट्या आणि जुलाब होऊ लागले . दोघांनाही वाहनात उलट्या झाल्या , त्यामुळे त्यांना केबिनमध्ये हलवण्यात आले . वाटेत एका ठिकाणी गाडीही थांबली . इंदूरला येईपर्यंत त्यांची प्रकृती अधिकच बिघडली .
