मुंबई : बॉलिवूड (Bollywood) अभिनेता सैफ अली खानच्या (Saif Ali Khan) अडचणीत आता मोठ्या प्रमाणात वाढ होण्याची शक्यता आहे. 11 वर्षांपूर्वीचे एक प्रकरण त्यांच्या अंगलट आले आहे. 11 वर्षांपूर्वी मुंबईतील एका फाईव्ह स्टार हॉटेलमध्ये व्यावसायिकासोबत झालेले भांडण आणि साक्षीदाराला जखमी केल्याप्रकरणी न्यायालयाने सैफ अली खानवर आरोप निश्चित केले आहेत. तसेच हा खटला पार्ट मॅजिस्ट्रेटच्या कोर्टात चालवण्यात येणार आहे. यामुळे सैफ अली खानच्या अडचणीत वाढ होण्याची शक्यता आहे.
या प्रकरणी न्यायालयाने या प्रकरणाशी संबंधित सर्व साक्षीदारांना समन्सही बजावले आहेत. या प्रकरणाची सुनावणी 15 जून रोजी होणार आहे. या प्रकरणी सैफने 2017 मध्ये न्यायालयात याचिका दाखल केली आणि अतिरिक्त आरोप निश्चित करण्याच्या विरोधात सत्र न्यायालयात धाव घेतली मात्र 2019 मध्ये न्यायालयाने सैफची याचिका फेटाळली होती.
काय आहे ते प्रकरण?
हे प्रकरण 22 फेब्रुवारी 2012 मधील आहे. यावेळी सैफ अली खान आणि तक्रारकर्ते त्यांच्या मित्रांसोबत फाइव्ह स्टारमध्ये जेवत असताना त्यांच्यात बाचाबाची झाली होती. यावेळी दक्षिण आफ्रिकेतील (South Africa) व्यावसायिक इक्बाल शर्मा (Iqbal Sharma) यांनी सैफ अली खान आणि त्याच्या मित्रांना मोठ्याने बोलण्यावर आक्षेप घेतला. यानंतर सैफने इक्बाल आणि त्याचे सासरे रमणभाई यांना धमकी दिली. तसेच सैफने इक्बालला धक्काबुक्कीसुद्धा केली होती.