पुणे : 97 वे अखिल भारतीय मराठी साहित्य संमेलन (Sahitya Sammelan) अमळनेर या ठिकाणी पार पडणार आहे. या संमेलनाच्या (Sahitya Sammelan) अध्यक्षपदी रवींद्र शोभणे यांची निवड करण्यात आली आहे. पुणे येथे रविवारी झालेल्या साहित्य महामंडळाच्या बैठकीत रवींद्र शोभणे यांच्या नावावर शिक्कामोर्तब करण्यात आला. प्रसिद्ध कवी प्रवीण दवणे, ज्येष्ठ कादंबरीकार डॉ. रवींद्र शोभणे, ज्येष्ठ बाल साहित्यिक न. म. जोशी यांची नावे या अध्यक्षपदासाठी चर्चेत होती. यामध्ये डॉ. रवींद्र शोभणे यांचे नाव बहुमताने निवडण्यात आले. 2,3 आणि 4 फेब्रुवारी रोजी हे साहित्य संमेलन होणार आहे अशी माहिती साहित्य महामंडळाच्या अध्यक्षा उषा तांबे यांनी दिली आहे.
ज्येष्ठ कादंबरीकार डॉ. रवींद्र शोभणे यांच्याविषयी?
कादंबरीकार रवींद्र शोभणे यांचा जन्म नागपूर जिल्ह्यात झाला. नरखेड तालुक्यात खरसोली या गावी त्यांचा जन्म झाला. याच गावातील आदर्श विद्यालयातून त्यांनी प्राथमिक शिक्षण घेतले. त्यानंतर महाविद्यालयीन शिक्षण नरखेड येथे तर पदव्युत्तर शिक्षण नागपूर येथील मॉरिस महाविद्यालयामध्ये केले. 1989 मध्ये त्यांनी पीएच.डी. ची पदवी मिळवली. कथालेखक म्हणूनही ते परिचित आहेत. 1991 मध्ये त्यांचा ‘वर्तमान’ हा पहिला कथासंग्रह प्रसिद्ध झाला.डॉ.रवींद्र शोभणे यांना अनेक प्रकारचे सन्मान मिळाले आहेत. यापूर्वी यवतमाळमधील पुसद येथे भरलेल्या विदर्भ साहित्य संघाच्या पहिल्या युवा साहित्य संमेलनाचे अध्यक्षपददेखील त्यांनी भूषवले होते. सन 2007 ते 2012 यादरम्यान त्यांनी मराठी भाषा साहित्य अकादमीमध्ये सल्लागार सदस्यपद सांभाळले होते.
अमळनेरमध्ये दुसऱ्यांदा संमेलन
अखिल भारतीय मराठी साहित्य संमेलन (Sahitya Sammelan) 1878 मध्ये प्रथम पुणे शहरात झाले होते. त्या संमेलनाचे अध्यक्ष न्या. महादेव गोविंद रानडे होते. अमळनेरमध्ये पहिले संमेलन कृष्णाजी पांडुरंग कुलकर्णी यांच्या अध्यक्षतेखाली 1952 मध्ये झाले होते. त्यानंतर आता अमळनेर 2024 मध्ये दुसऱ्यांदा हे संमेलन होत आहे.
