सोलापूर : प्रसिद्ध नृत्यांगना गौतमी पाटील (Gautami Patil) ही तिच्या डान्समुळे नेहमी चर्चेत असते. तिचा कार्यक्रम म्हंटला तर लोकांची गर्दी आली. आणि गर्दी आली कि राडा आलाच. गौतमी आणि राडा हे जणू समीकरणच बनलं आहे. मागच्या काही महिन्यांपासुन तिचा कार्यक्रम आणि राडा ठरलेलंच आहे. यादरम्यान आता गौतमी पाटीलच्या लावणी कार्यक्रमाला पोलिसांनी परवानगी नाकारल्याची घटना समोर आली आहे. सोलापूर जिल्ह्यात होणाऱ्या कार्यक्रमाला पोलिसांनी परवानगी नाकारली आहे. परवानगी नाकारण्यामागचे कारणदेखील पोलिसांनी सांगितले आहे.
या कारणामुळे नाकारली परवानगी?
नवरात्रीच्या कार्यक्रमाला जिल्ह्यातील अनेक ठिकाणी मोठा पोलीस बंदोबस्त तैनात करण्यात येणार आहे. त्यामुळं गौतमी पाटीलच्या लावणी कार्यक्रमाला अतिरिक्त पोलिसांचा फौजफाटा देणं शक्य नसल्याने पोलिसांनी गौतमीच्या कार्यक्रमाला परवानगी नाकारली आहे. त्यामुळं आता गौतमीच्या चाहत्यांमध्ये संताप व्यक्त केला जात आहे.
नवरात्री आणि दांडियाच्या कार्यक्रमाच्या निमित्ताने सोलापुरातील एका माध्यम समुहाने गौतमी पाटीलच्या लावणीचा कार्यक्रम आयोजित केला होता. त्यासाठी रितसर परवानगी देखील मागण्यात आली. परंतु नवरात्रीला पोलिसांना जिल्ह्यातील अनेक ठिकाणी बंदोबस्तासाठी जावं लागणार आहे. मनुष्यबळ कमी असल्याने पोलिसांनी गौतमीच्या कार्यक्रमाची परवानगी नाकारली आहे.