नवी दिल्ली : केंद्र सरकारने रक्षाबंधन आणि ओणम सणानिमित्त महिलांना मोठी भेट दिली होती. एलपीजी गॅस सिलेंडरच्या (Free LPG Connection) किंमतीत सरसकट 200 रुपयांची सवलत दिली होती. तर उज्ज्वला योजनेतर्गंत 400 रुपयांची सवलत देण्यात आली. केंद्र सरकारने आता देशातील 75 लाख महिलांना मोफत गॅस कनेक्शन देण्याचा निर्णय घेतला आहे. पंतप्रधान नरेंद्र मोदी यांच्या अध्यक्षतेखाली केंद्रीय मंत्रीमंडळाची बैठक झाली. त्यात हा निर्णय घेण्यात आला. याविषयीच्या प्रस्तावावर शिक्कामोर्तब करण्यात आले. या निर्णयामुळे केंद्र सरकारच्या तिजोरीवर 1,650 कोटी रुपयांचा भार पडणार आहे.
1,650 कोटींचा तिजोरीवर भार
मंत्रीमंडळाने आज पंतप्रधान उज्ज्वला योजनेतंर्गत हे नवीन मोफत गॅस कनेक्शन देण्याचा निर्णय घेतला आहे. पुढील तीन वर्षांत या गॅस कनेक्शनची जोडणी करण्यात येणार आहेत. 75 लाख एलपीजी कनेक्शन देण्यात येणार आहे. यामुळे सरकारच्या तिजोरीवर 1,650 कोटींचा बोजा पडणार आहे.
उज्ज्वला योजना 2.0 चा फायदा कोणाला होणार?
1) PMUY वेबसाइटनुसार, गरीब कुटुंबातील प्रौढ महिला ज्यांच्या घरात LPG कनेक्शन नाही ती उज्ज्वला 2.0 योजनेअंतर्गत पात्र मानली जाईल. या योजनेचे लाभार्थी खालीलपैकी कोणत्याही एका श्रेणीतील असणे आवश्यक आहे.
2) सामाजिक-आर्थिक आणि जात जनगणना 2011 अंतर्गत समाविष्ट महिला यासाठी पात्र असतील.
3) अनुसूचित जाती/अनुसूचित जमातीचे लोक, प्रधानमंत्री आवास योजना, अंत्योदय अन्न योजना, वनवासी, सर्वात मागासवर्गीय, पूर्वीच्या चहाच्या बागेतील जमाती, नदी बेटांवर राहणारे लोक (लाभार्थी आवश्यक सहाय्यक कागदपत्रे सादर करतील).
4) जर एखादी महिला वरील दोन श्रेणींमध्ये येत नसेल, तर ती गरीब कुटुंबांतर्गत लाभार्थी असल्याचा दावा करू शकते.