मेहसाणा- भोंग्यावरून महाराष्ट्रात राजकारण पेटलेले असताना आता याचे पडसाद गुजरातमध्ये उमटले आहेत. मंदिरात लाऊड स्पीकरवर आरती लावल्याने दोन तरुणांना बेदम मारहाण करण्यात आली. यामध्ये एका तरुणाचा मृत्यू झाला तर दुसरा गंभीर आहे. ही घटना मेहसाणा जिल्ह्यात बुधवारी संध्याकाळी ७ वाजता घडली.
जसवंतजी ठाकोर असं मृत पावलेल्या तरुणाचं नाव आहे. तर त्याचा भाऊ अजित ठाकोर गंभीर आहे. याप्रकरणी जसवंतचा मोठा भाऊ अजित ठाकोर यांनी पोलिसात फिर्याद दिली आहे.
जोतना तालुक्यातील लक्ष्मीपुरा गावात बुधवारी संध्याकाळी ७ च्या सुमारास दोघे भाऊ घराशेजारीच असलेल्या मेल्डी माता मंदिरात आरती करत होते . लाऊडस्पीकरवर आरती सुरू होती. त्यावेळी सदाजी ठाकोर , विष्णूजी ठाकोर , बाबूजी ठाकोर , जयंती ठाकोर, जावन ठाकोर आणि विनुजी ठाकोर तिथे पोहोचले. इतक्या मोठ्या आवाजात लाऊडस्पीकरवर आरती का लावली आहे, अशी विचारणा त्यांनी केली. आम्ही आरती करत आहोत, असं उत्तर अजित ठाकोर यांनी दिलं.
त्यानंतर सदाजी ठाकोर यांनी शिवीगाळ सुरू केली. अजित ठाकोर यांनी विरोध करताच सदाजी यांनी त्यांच्या निकटवर्तीयांना बोलावलं. त्या सगळ्यांनी जसवंत आणि अजित यांच्यावर काठ्यांनी हल्ला केला. अचानक झालेल्या हल्ल्यात दोघे भाऊ जखमी झाले. त्यांना गंभीर अवस्थेत मेहसाणातील जिल्हा रुग्णालयात दाखल करण्यात आलं. तिथे जसवंतचा मृत्यू झाला. पोलिसांनी सहा जणांविरोधात गुन्हा दाखल करून त्यांना अटक केली. त्यांच्याविरोधात हत्येचा गुन्हा नोंदवण्यात आला आहे.
