मुंबई : राज्यात मराठा आरक्षणाचा (Maratha Reservation) प्रश्न चांगलाच तापला आहे. शांततेत चाललेल्या या आंदोलनाने अचानक हिंसक वळण घेतले आहे. राज्यात काही ठिकाणी बस, पक्षांची कार्यालये, आमदारांची घरे जाळण्यात येत आहेत. यामुळे कायदा व सुव्यवस्थेचा मुद्दा ऐरणीवर आला आहे. त्यातच आता या आंदोलकांकडून मंत्री हसन मुश्रीफ यांच्या गाडीचीदेखील तोडफोड करण्यात आली आहे. आकाशवाणी येथील आमदार निवासाबाहेर ही गाडी पार्क करण्यात आली होती. दोन व्यक्तींकडून वाहनाची तोडफोड करण्यात आली. तोडफोड करणाऱ्या व्यक्तींना पोलिसांनी अटक केली आहे. या हल्ल्याप्रकरणी हसन मुश्रीफ यांनी आपली प्रतिक्रिया दिली आहे.
काय म्हणाले हसन मुश्रीफ ?
‘मी सुरक्षित आहे. घटन घडली त्यावेळी मी तिथं नव्हतो. सध्या ठराविक दोन ते तीन व्यक्ती ठरवून आमदार आणि खासदारांना फोन करत आहेत. त्यानंतर त्याची ऑडिओ क्लिप व्हायरल करत आहेत. कालच्या मंत्रिमंडळ बैठकीत यावर चर्चा झाली. त्यांच्यावर कारवाई करण्यात येईल. आम्ही सर्व आमदारांनी एक दिवशीय अधिवेशनाची मागणी केली आहे. ज्यांनी गाड्या फोडल्या त्यांच्या भावना समजून शकतो. मी स्वतः गृह खात्याला फोन करुन त्यांच्यावर कारवाई करू नका असं सांगणार असल्याची’ प्रतिक्रिया हसन मुश्रीफ यांनी दिली आहे.
