अमरावती : अमरावतीमधून (Amrawati) शिक्षण क्षेत्रात खळबळ उडवून देणारी बातमी समोर आली आहे. राज्यात पेपर फुटीच्या (Paper Leak) घटना काही कमी होताना दिसत नाही आहेत. काही दिवसांपूर्वी डॉ. बाबासाहेब आंबेडकर मराठवाडा विद्यापीठाच्या (Dr. Babasaheb Ambedkar Marathwada University) पदवी परीक्षेत चक्क 300 ते 500 रुपयात मासकॉपी करून दिली जात असल्याचा धक्कादायक प्रकार समोर आला होता. यानंतर आणखी एक धक्कादायक प्रकार समोर आला आहे.
काय आहे संपूर्ण प्रकार ?
अमरावती येथील शासकीय विदर्भ ज्ञान विज्ञान संस्थेत उन्हाळी 2023 परीक्षेत विधी अभ्यासक्रमाच्या लॉ ट्रस्ट विषयाच्या चौथ्या सत्राचा मोबाईलद्वारे व्हाट्सअपवर पेपर लीक करण्यात आला. धक्कादायक म्हणजे यात एका भाजपच्या (BJP) माजी नगरसेवकाचा हात आहे. गाडगेनगर पोलिसांनी या प्रकरणी भाजपचे माजी नगरसेवक प्रणीत सोनी (Praneet Soni), भूषण किसन हरकुट (Bhushan Kisan Harkut), किशोर पिंपळकर (Kishore Pimpalkar) या तिघांना ताब्यात घेतले आहे.
संत गाडगेबाबा अमरावती विद्यापीठ संलग्नित शासकीय विदर्भ ज्ञान विज्ञान संस्थेत शनिवारी सकाळी 9 ते 12 या दरम्यान विधी अभ्यासक्रमाच्या लॉ ट्रस्ट विषयाचा फोर्थ सेमिस्टरचा पेपर होता. मात्र, पेपर सुरू होण्यापूर्वीच तो विद्यार्थ्यांच्या मोबाईलवर पोहोचला होता. तसेच या विषयाच्या झेरॉक्स सुद्धा या तिघांकडे आढळून आल्या. या प्रकाराची माहिती मिळताच अमरावती विद्यापीठाच्या परीक्षा व मूल्यांकन मंडळाच्या संचालक मोनाली तोटे व अमरावती विद्यापीठ व्यवस्थापन परिषदेचे सदस्य भैय्यासाहेब मेटकर तातडीने घटनास्थळी दाखल होऊन संपूर्ण प्रकरण जाणून घेतले. याप्रकरणी आता परीक्षा खोलीवर ड्युटी बजावणारे व दोषी विद्यार्थ्यांवरही पोलीस कारवाई करण्यात येणार आहे.