पुणे जिल्ह्यातील दौंड तालुक्यात फोटो शूट करण्यासाठी साठवण तलावाजवळ गेलेल्या तीन तरुणांचा तलावात बुडून दुर्दैवी मृत्यू झाल्याची घटना समोर आली आहे. दौंड कुरकुंभ मार्गावरील मोरेवस्ती जवळ रविवारी सायंकाळी ही दुर्घटना घडली. दौंड नगरपालिकेला पाणी पुरवठा करणाऱ्या शहराजवळील मेरगळवाडी येथील तलावात पोहण्यासाठी गेले असता या युवकांचा पाण्यात बुडुन दुर्दैवी मृत्यू झाल्याची धक्कादायक घटना रविवारी रात्री घडली.
असरार अब्दुल अलीम काझी, करिम अब्दुल हादी काझी, अतिक उझजमा फरिद शेख अशी या युवकांची नावे आहेत. याबाबत पोलीसांनी दिलेल्या माहितीनुसार बराच वेळ घरी न परतल्याने घराच्यांनी व मित्रांनी त्यांचा शोध घेतला दौंड शहरात मेगळवाडी, लिंगाळी येथील पिण्याचे पाणी पुरवठा करणारे दौंड नगरपालिकेच्या तळ्याजवळ जाऊन पाहिले असता तेथे त्यांची गाडी मिळून आली. तलावाच्या नजीक जाऊन शोध घेतला असता तलावाच्या काठाजवळ मुलांचे कपडे व बॅग असे साहित्य मिळून आले. लोकांना संशय आला की, तिघे मुले तलावात पोहत असताना पाण्यात बुडले असावे असा संशय आल्याने दौंड पोलिस स्टेशनला याबाबत माहिती दिली.
माहिती मिळताच पोलिसांनी घटनास्थळी धाव घेतली आणि पोलीसांनी लोकांच्या मदतीने तलावातील पाण्यात जावून शोध घेतला असता या तिघांचा मृतदेह आढळून आला. त्यानंतर त्यांना दौंड उपजिल्हा रूग्णालयात हलविण्यात आले, त्याआधीच तिघांचा मृत्यू झाला होता, अशी माहिती डॉक्टरांनी दिली आहे.