भारतीय शेअर बाजारात (Share Market) आज सलग दुसऱ्या दिवशी तेजी दिसून आली. मुंबई शेअर बाजाराचा निर्देशांक सेन्सेक्स 400 अंकांनी वधारला. तर, राष्ट्रीय शेअर बाजाराचा निर्देशांक निफ्टीने 19,800 अंकाची पातळी ओलांडली आहे. आज जेव्हा शेअरमार्केट बंद झाले तेव्हा मुंबई शेअर बाजाराचा निर्देशांक सेन्सेक्स 393.69 अंकांनी वधारत 66,473.05 वर बंद झाला. तर, राष्ट्रीय शेअर बाजाराचा निर्देशांक निफ्टी 121.50 अंकांच्या तेजीसह 19,811.35 वर स्थिरावला.
आजच्या व्यवहारात, एफएमसीजी सेक्टरमध्ये झालेल्या खरेदीमुळे निफ्टी एफएमसीजी निर्देशांक 0.85 टक्क्यांच्या तेजीसह बंद झाला. निफ्टी एनर्जी 0.89 टक्के, मेटल, बँकिंग, फार्मा, इन्फ्रा, कंझ्युमर ड्युरेबल्स, हेल्थकेअर, ऑइल अँड गॅस, ऑटो सेक्टरमधील शेअर्स तेजीसह बंद झाले. तर आयटी आणि पीएसयू बँक सेक्टरमध्ये घसरण दिसून आली.
आजच्या व्यवहारात सेन्सेक्समधील 30 कंपन्यांपैकी 24 कंपन्यांच्या शेअर दरात वाढ झाली. तर, निफ्टीच्या 50 कंपन्यांपैकी 39 कंपन्यांच्या शेअर्स दरात वाढ दिसून आली.आजच्या व्यवहारात विप्रोच्या शेअर दरात 3.39 टक्क्यांची तेजी दिसून आली. तर, अल्ट्राटेक सिमेंटमध्ये 2.09 टक्के, रिलायन्स 1.62 टक्के, एचयूएल 1.57 टक्के, नेस्ले 1.15 टक्क्यांनी वधारले. एचसीएल टेकच्या शेअर दरात 1.51 टक्क्यांची घसरण दिसून आली. टीसीएस 0.42 टक्के, एसबीआय 0.41 टक्क्यांच्या घसरणीसह बंद झाले.