आपल्याला हार्ट अटॅक येऊ शकतो, अशी कधी तरी भीती वाटणे ही एक सामान्य बाब आहे. मात्र, जर कुणी सतत अशा भीतीच्या छायेत वावरत असेल आणि प्रत्येक क्षणाला याबाबतचाच विचार करीत असेल तर त्याला ‘कार्डियोफोबिया’ असे म्हणतात. हा एक भयगंड असून, त्याने ग्रासलेल्या माणसाला सतत वाटत असते की, आपल्याला हार्ट अटॅक येणार..!
हा फोबिया एक प्रकारचा एंग्झयटी डिसऑर्डर आहे. आपल्या दैनंदिन जीवनात त्यामुळे समस्या निर्माण होऊ शकतात. सतत हार्ट अटॅकच्या भीतीच्या छायेत राहिल्याने कामात माणसाचे मन एकाग्र होऊ शकत नाही. या भयगंडाने ग्रस्त असलेल्या व्यक्तीच्या हृदयाचे ठोके अनियमित झाले की तो आणखीच घाबरतो. छातीत किंवा खांद्यामध्ये वेदना झाल्यावर ही त्याला वाटते की आपल्याला हृदयविकार जडलेला आहे अनेक कारणांमुळे माणसाला कार्डियोफोबिया होऊ शकतो.
एखाद्या परिचिताचा किंवा आप्तस्वकीयाचा हार्ट अटॅकने मृत्यू होणे ही यामागील कारण असू शकते. तसेच लहानपणीच्या एखाद्या दुर्घटनेची कारणे यामध्ये असू शकतात. एंग्झयटी, हृदयाची धडधड वाढणे, भोवळ येणे, उच्च रक्तदाब, अचानक घाम येणे, कंप सुटणे, छातीत वेदना ही फोबियाची लक्षण आहेत. अर्थात ही लक्षणे खऱ्या हार्ट अटॅकवेळीही असू शकतात. त्यामुळे अशा वेळी डॉक्टरांकडून तपासणी करून घेणे गरजेचे ठरते. जर सर्व चाचण्या करूनही भय कायम राहत असेल तर याबाबत डॉक्टरांचा सल्ला घेणे आवश्यक ठरते. चांगल्या सायकॉलॉजिस्ट कडून थेरपी किंवा कौन्सिलिंगचा यासाठी लाभ होऊ शकतो.