तुम्ही सकाळी किंवा संध्याकाळी सावित्रीबाई फुले पुणे विद्यापीठाच्या आवारात फिरायला जात असाल तर तुम्हाला आता फिरण्यासाठी, व्यायामासाठी नावनोंदणी करावी लागणार आहे. या माध्यमातून विद्यापीठाच्या आवारात येणाऱ्या नागरिकांची मूलभूत माहिती विद्यापीठ प्रशासन संकलित करणार आहे.
विद्यापीठ आवाराच्या आणि तिथे येणाऱ्या नागरिकांच्या सुरक्षेच्या दृष्टिकोनातून विद्यापीठात सकाळी आणि संध्याकाळी व्यायाम आणि फिरण्यासाठी येणाऱ्या नागरिकांची नोंदणी करण्याची प्रक्रिया सुरू झाली आहे.
ही नोंदणी विनामूल्य असून नोंदणीसाठी विद्यार्थी सुविधा केंद्राजवळील सुरक्षा केबिनमध्ये आणि सुरक्षा विभागात डेस्क ठेवून स्वतंत्र यंत्रणा कार्यान्वित केली आहे.
या डेस्कवर नोंदणी अर्ज ठेवला असून तो भरून नागरिकांना त्याठिकाणी जमा करायचा आहे.
ही नोंदणी 28 जानेवारीपर्यंत करण्यात येणार आहे.
नोंदणीधारकांना बायोमेट्रिक प्रवेश देणार असल्याची माहिती विद्यापीठ प्रशासनाने दिली आहे.
औंध, रेंजहिल्स, सांगवी, पाषाण रस्ता, मॉडेल कॉलनी या भागातून दररोज सकाळी आणि संध्याकाळी फिरण्यासाठी आणि व्यायामासाठी येणाऱ्या नागरिकांची संख्या लक्षणीय आहे. सर्व नागरिकांनी नोंदणी त्वरित करून घ्यावी जेणेकरून पुढील गैरसोय होणार नाही , असं आवाहन विद्यापीठान केलं आहे.