मुंबई : मुंबईतील मंत्रालय परिसरात एक धक्कादायक प्रकार समोर आला आहे. यामध्ये मंत्रालयातील उपमुख्यमंत्री देवेंद्र फडणवीस यांच्या दालनासमोर एका व्यक्तीने हातावर कटरने वार करून आत्महत्येचा प्रयत्न (Suicide Attempt) केला. त्या व्यक्तीविरोधात आत्महत्येचा प्रयत्न (Suicide Attempt) केल्याप्रकरणी गुन्हा दाखल करण्यात आला असून त्याला नोटीस देण्यात आले आहे. मंत्रालयाच्या सहाव्या मजल्यावर बुधवारी दुपारी साडेतीन वाजताच्या सुमारास ही घटना घडली आहे.
काय घडले नेमके?
सुरेश पांडुरंग जगताप असे आत्महत्येचा प्रयत्न करणाऱ्या व्यक्तीचे नाव आहे. मूळचे सातारा येथील फलटणचे रहिवासी असलेले सुरेश यांनी कर्जबाजारीपणाला कंटाळून हे पाऊल उचलले आहे. त्यांनी सर्वप्रथम प्रवेशिका(पास) घेऊन बुधवारी मंत्रालयात प्रवेश केला. यानंतर त्यांनी फडणवीस यांच्या दालनासमोर येताच हातावर कटरने वार करण्यास सुरूवात केली. तेथील पोलिसांनी त्याला तात्काळ ताब्यात घेतले आणि त्यांना उपचारासाठी जी. टी. हॉस्पीटलमध्ये दाखल केले. यानंतर त्यांना मरीन ड्राईव्ह पोलिसांच्या ताब्यात देण्यात आले.
मरीन ड्राईव्ह पोलिसांनी त्याला ताब्यात घेऊन त्याच्याविरुद्ध आत्महत्येचा प्रयत्न (Suicide Attempt) केल्याप्रकरणी गुन्हा दाखल केला. यानंतर त्यांना फौजदारी दंड प्र.सं. कलम 41 (अ) (1) अन्वये नोटीस देऊन सोडण्यात आले आहे. कर्जबाजारीपणाला कंटाळून त्याने डाव्या हाताला कटरने जखम केली आहे. जीटी रुग्णालयात त्याच्यावर उपचार करण्यात आले असून आत्महत्येत वापरण्यात आलेले कटर पोलिसांकडून जप्त करण्यात आले आहे.