जळगाव : जळगाव शहरातील (Jalgaon News) मयूर कॉलनीमधील दुर्गेश भरत बारी (20) या तरुणाने घरात गळफास घेऊन आत्महत्या केल्याची घटना समोर आली आहे. ही घटना शुक्रवारी दुपारी एक वाजता उघडकीस आली. त्याने जेव्हा आत्महत्या केली तेव्हा वडील कामावर, आई नातेवाईकांकडे आणि बहीण क्लासला गेलेली होती. बहीण क्लासवरून घरी परतली तेव्हा दरवाजा उघडताच भाऊ गळफास घेतलेल्या अवस्थेमध्ये आढळून आला.
काय घडले नेमके?
जळगाव शहरातील खंडेराव नगरातील रहिवासी असलेले भरत बारी आणि त्यांचे कुटुंबीय सध्या पिंप्राळामधील मयूर कॉलनीमध्ये राहतात. भरत बारी हे होमगार्ड असून इतर वेळी ते रिक्षा चालवितात. शुक्रवारी नेहमीप्रमाणे ते कामावर गेलेले होते. त्यांच्या पत्नी कविता या नातेवाईकांकडे गेल्या होत्या तर त्यांची मुलगी नंदिनी ही क्लासला गेलेली होती. त्याचवेळी त्यांचा मुलगा दुर्गेश हा घरात एकटाच होता. घरात कोणीही नसल्याची संधी साधत त्याने घराच्या छताला गळफास घेतला. दुपारच्या एक वाजेच्या सुमारास क्लासला गेलेली नंदिनी ही घरी आली त्यावेळी घराचा दरवाजा बंद होता. तिने आवाज दिला असता कोणताही प्रतिसाद मिळाला नाही.
यानंतर तिने शेजारच्यांच्या मदतीने दरवाजा उघडला. त्यावेळी दुर्गेश हा गळफास घेतलेल्या अवस्थेत आढळून आला. त्याला तातडीने शासकीय वैद्यकीय महाविद्यालय आणि रुग्णालयात हलविले असता डॉक्टरांनी मृत घोषित केले. दुर्गेशने आयटीआय केले असून तो मिळेल ते काम करीत होता. दुर्गेशने आत्महत्या केल्याने कुटुंबियांना मोठा धक्का बसला आहे. त्याने नेमकी कोणत्या कारणामुळे आत्महत्या केली हे मात्र अद्याप समजू शकलेले नाही. या प्रकरणी रामानंद पोलीस ठाण्यात अकस्मात मृत्यूची नोंद करण्यात आली आहे.