ठाणे : ठाण्यात (Thane Crime) शुक्रवारी हत्येचा थरार पाहायला मिळाला. रात्री एकाने आपल्या पत्नीवर गोळ्या झाडून तिची हत्या (Thane Crime) केली. यानंतर त्याने देखील स्वत:वर गोळी झाडत आत्महत्या केली. ही घटना येथील कळवा येथील कुंभाळआळी येथे घडली. या घटनेने परिसरात मोठी खळबळ उडाली आहे. प्रमिला साळवी असे गोळी झाडून खून करण्यात आलेल्या महिलेचे नाव आहे. तर दिलीप साळवी असे हत्या करणाऱ्या पतीचे नाव आहे. त्यांनी प्रमिला यांचा खून करून स्वत: देखील आत्महत्या केली आहे.
काय घडले नेमके?
दिलीप साळवी यांनी त्यांच्या यशवंत निवास या ठिकाणी पत्नी प्रमिला हिच्यावर त्यांच्या कडे असलेल्या बंदुकीतून गोळी झाडली. यानंतर त्यांनी देखील स्वत:वर गोळी झाडून आत्महत्या केली. त्यांनी हे पाऊल का उचलले या बाबत अद्याप माहिती मिळू शकली नाही. मात्र, कौटुंबिक वादातून ही घटना घडली असल्याचा अंदाज वर्तवला जात आहे.
या घटनेची माहिती मिळताच तात्काळ कळवा पोलीस घटनास्थळी दाखल झाले आणि त्यांनी सदर घटनेचा तपास सुरू केला आहे. दोघांचेही मृतदेह पोस्टमोर्टमसाठी कळवा रुग्णालयात पाठवण्यात आले आहेत. या घटनेमागचे नेमके कारण चौकशी केल्यानंतर समोर येईल. दिलीप साळवी हे राष्ट्रवादीचे माजी नगरसेवक मिलिंद साळवी यांचे बंधू, तर माजी नगरसेविका अपर्णा साळवी यांचे दीर होते.