जळगाव : जळगावमध्ये (Jalgaon) पोलिसी पेशाला काळिमा फासणारी घटना उघडकीस आली आहे. यामध्ये 1 जून रोजी भर दिवसा जळगाव शहरातील स्टेट बँक ऑफ इंडियाच्या (State Bank of India) शाखेत दरोडा (Robbery) टाकण्यात आला. यामुळे संपूर्ण शहरात घबराटीचे वातावरण निर्माण झाले होते. संपूर्ण जिल्ह्यात या दरोड्याची चर्चा रंगली होती. त्यामुळे या दरोडेखोरांना पकडणे हे पोलिसांपुढे मोठे आव्हान होते. पोलिसांनी तातडीने आपली तपासाची सूत्रे हलवून अवघ्या 24 तासात दरोडेखोरांना पकडले.
यामध्ये सर्वात धक्कादायक बाब म्हणजे दरोडखोरांमधील मुख्य सूत्रधार हा निलंबित पीएसआय आहे. तसेच या गुन्ह्यात बँकेच्या शिपायाचादेखील सहभाग होता. मनोज सूर्यवंशी (Manoj Suryavanshi) असे या आरोपी शिपायाचे नाव आहे. तो बँकेत रोजंदारीवर शिपाईची नोकरी करायचा. बँकेचा शिपाई असल्याने त्याला बँकेच्या शाखेतील इत्यंभूत माहिती होती. याच गोष्टीचा फायदा उचलत त्याने आपला पाहुणा निलंबित पीएसआय शंकर जासक (Suspended PSI Shankar Jasak) याला बँकेच्या कामकाजाबद्दल सविस्तर माहिती दिली. यानंतर त्यांनी पूर्ण प्लॅनिंग करून हा दरोडा टाकला. या दरोड्यामध्ये पीएसआय शंकर जासक याने आपल्या वडिलांनादेखील सामील करून घेतले होते.
कशाप्रकारे टाकला दरोडा?
संबंधित दरोड्याची घटना ही गुरुवारी (1 जून) घडली होती. आरोपी हातात धारदार चॉपरसारखे चाकू घेऊन बँकेत शिरले होते. त्यांनी बँक कर्मचाऱ्यांवर दमदाटी करत जीवे मारण्याची धमकी दिली. त्यांनी बँकेच्या मॅनेजरसह कर्मचाऱ्यांना बंधक बनवलं होतं. त्यांनी बँकेतील मोठा मुद्देमाल लुटून नेला होता. विशेष म्हणजे बँक मॅनेजरच्याच दुचाकीवरुन ते पसार झाले होते. अवघ्या 15 मिनिटात त्यांनी हे सगळं कृत्य केले होते.
आरोपींकडून मुद्देमाल केला जप्त
पोलिसांनी आरोपींना पकडल्यानंतर त्यांच्याकडून 17 लाख रोकड आणि 3 कोटी 60 लाखांचे सोने हस्तगत केले. या आरोपींनी लुटलेल्या मुद्देमालमधून 70 हजार रुपये खर्च केले असल्याची माहिती उघडकीस आली आहे.