सोलापूर : सोलापूरमधून (Solapur News) अपघाताची एक धक्कादायक घटना समोर आली आहे. यामध्ये (Solapur News) एका चिमुकलीसह 4 जणांचा चेंगरून मृत्यू झाला आहे. सोलापूर शहराजवळील होटगी गावाजवळ असलेल्या औज गावा जवळ शुक्रवारी दुपारी 12 वाजण्याच्या सुमारास सिमेंटचा बल्कर पलटी होऊन हा अपघात झाला.
काय घडले नेमके?
या अपघातात प्रज्ञा बसवराज दोडतले (इयत्ता 3 री,रा औज), विठ्ठल शिंगाडे (वय 70 वर्ष,रा औज ता दक्षिण सोलापूर) या दोघांचा दुर्दैवी मृत्यू झाला तर अन्य दोघांची बाहेरगावचे असून त्यांची अद्याप ओळख पटलेली नाही. या अपघाताची माहिती मिळताच अप्पर पोलीस अधीक्षक हिम्मत जाधव, वळसंग पोलीस ठाण्याचे एपीआय सनगले,अतुल भोसले,आरटीओ अधिकारी गवारे हे आपल्या फौजफाट्यासह तातडीने घटनास्थळी दाखल झाले आहेत.
या अपघातानंतर औज येथील ग्रामस्थांनी एकच गोंधळ सुरू केला आहे. औज गावाच्या पूढे चेट्टीनाड व झुअरी सिमेंटच्या कंपन्या आहेत. सिमेंटच्या वाहनांची मोठ्या प्रमाणात वाहतूक होते. यापूर्वी गावातील एका इसमाचा मृत्यू झाला आहे. प्रशासनाकडे तक्रार करून देखील ही वाहतूक बंद केली नाही. यामुळे ग्रामस्थांनी संताप व्यक्त केला. त्यांनी मृतदेहाची रुग्ण वाहिका अडवून धरल्यामुळे घटनास्थळी थोडी तणावपूर्ण परिस्थिती निर्माण झाली होती.