सिंधुदुर्ग : आज महाराष्ट्रात सगळीकडे गणपतीचा सण साजरा केला जात आहे. यादरम्यान सिंधुदुर्गमध्ये (Sindhudurg News) एक धक्कादायक घटना घडली आहे. यामध्ये मालवण तालुक्यातील चौके-गोड्याचीवाडी येथील व्यावसायिक राजकमल वामन गावडे (36) या युवकावर गणेश चतुर्थीच्या मुहूर्तावर काळाने घाला घातला आहे. घरापासून काही अंतरावर असलेल्या पंपाच्या थ्री फेज वायरची दुरुस्ती करण्यासाठी गेला असता त्याला वीजेचा शॉक लागला आणि त्याचा दुर्दैवी मृत्यू झाला. या घटनेमुळे सगळीकडे शोककळा पसरली आहे.
राजकमल वामन गावडे हा घटनेच्या वेळी सकाळी 8.45 वाजण्याच्या सुमारास चहापाणी करुन घरापासून काहीशा अंतरावर असलेल्या वराहपालन शेडमध्ये पाणी सोडायला गेला. मात्र पंपाने पाणी येत नसल्याने शेडच्या मागे पंपाच्या तुटलेल्या वायरला जोडताना त्याला विजेचा धक्का बसल्याने त्याचा जागीच मृत्यू झाला. दुपारपर्यंत राजकमल घरी न आल्याने त्याच्या फोनवर पत्नीचे वारंवार फोन केले. मात्र त्यांच्याकडून प्रतिसाद मिळाला नाही. यानंतर पत्नीने शेतावर जाऊन शोध घेतला असता ही घटना उघडकीस आली.
यानंतर गावच्या पोलीस पाटलांनी याची माहिती पोलिसांना दिली. मालवण पोलीस ठाण्याचे सहाय्यक पोलीस निरीक्षक सुनिल जाधव, सुभाष शिवगण, अजय येरम, डी. व्ही. जानकर यांनी घटनास्थळी धाव घेऊन घटनास्थळाचा पंचनामा केला. या घटनेमुळे संपूर्ण गावात हळहळ व्यक्त केली जात आहे.
