पुणे : पुण्यातील येरवडा पोलीस स्टेशनमध्ये एक धक्कादायक घटना घडली आहे. यामध्ये ट्रॅव्हल व्यवसायिकाकडून अपघाताची तक्रार दाखल करण्यासाठी तेरा हजाराची लाच स्वीकारणाऱ्या येरवडा पोलीस स्टेशन मधील हवलदाराला सोमवारी मध्यरात्री अटक करण्यात आली आहे. या लाच प्रकरणी आणखी दोन हवालदारांविरुद्ध गुन्हा दाखल केला आहे.
काय आहे नेमके प्रकरण?
तक्रारदार यांचा ट्रॅव्हल्स एजन्सीचा व्यवसाय आहे. कारचा अपघाताची तक्रार दाखल करण्यासाठी पोलीस हवालदार जयराम सावळकर, विनायक मुधोळकर राजेंद्र दीक्षित यांनी तक्रारदार यांच्याकडे 20 हजार रुपयांची मागणी केली होती. तडजोडीअंती 13 हजार रुपये रक्कम हवालदार राजेंद्र दीक्षित यांनी येरवडा पोलीस स्टेशन येथे स्वीकारताना त्यांना रंगेहात पकडण्यात आले. या प्रकरणी येरवडा पोलीस स्टेशनमध्ये गुन्हा दाखल करण्याचे काम सुरु आहे.
लाचलुचपत प्रतिबंधक विभागाचे पोलीस अधीक्षक अमोल तांबे, अप्पर अधीक्षक श्रीमती शितल जानवे यांच्या मार्गदर्शनाखाली पोलीस निरीक्षक भारत साळुंखे, पोलीस निरीक्षक प्रवीण निंबाळकर, सहाय्यक फौजदार मुकुंद आयाचित,पोलीस शिपाई भूषण ठाकूर,पांडुरंग माळी यांच्या पथकाने ही कामगिरी केली आहे. पोलीस निरीक्षक भारत साळुंखे पुढील तपास करत आहेत.