मुंबई : काही दिवसांपूर्वी राष्ट्रवादीचे अध्यक्ष शरद पवार (Sharad Pawar) यांना धमकी दिल्यानंतर ठाकरे गटाचे खासदार संजय राऊत (Sanjay Raut) यांनाही जीवे मारण्याची धमकी देण्यात आली होती. संजय राऊत यांच्यासह आमदार सुनील राऊत यांनाही जीवे मारणार असल्याचे धमकी देणाऱ्याने सांगितले होते. त्यानंतर आता संजय राऊत धमकीप्रकरणात मोठा खुलासा झाला आहे. संजय राऊत यांना धमकावणारा हा सुनील राऊत (Sunil Raut) यांचाच निकटवर्तीय असल्याची धक्कादायक माहिती समोर आली आहे. या सर्व प्रकारामुळे संजय राऊत यांनी त्यांची सुरक्षा वाढवण्यासाठी हा सगळा बनाव रचला असल्याची चर्चा राजकीय वर्तुळात सुरु झाली आहे.
खासदार संजय राऊत आणि त्यांचे भाऊ आमदार सुनील राऊत यांना धमकी दिल्याच्या प्रकरणामध्ये मयूर शिंदे नावाच्या व्यक्तीला कांजूर पोलिसांनी ताब्यात घेतलं आहे. त्याची चौकशी केली असता तो सुनील राऊत यांचा कार्यकर्ता असल्याचे समोर आले. धमकीप्रकरणातील आरोपी मयूर शिंदेचे संजय राऊत आणि सुनील राऊत यांच्यासोबतचे बरेच फोटो सोशल मीडियावर व्हायरल झाले आहेत. त्यामुळे वाढीव सुरक्षेसाठी हा सगळा बनाव रचल्याचे समोर आले आहे
मयूर शिंदेनी काय दिली होती धमकी?
“संजय राऊत यांनी सकाळचा भोंगा बंद करावा नाहीतर त्यांना गोळी घालेन. संजय राऊत यांना फोन उचलायला सांग ते घाबरले आहेत का? दोन्ही भावांना गोळी घालेन. दोघांना स्मशानात पाठवेन. एका महिन्याच्या आता दोघांनाही गोळी मारेन,” अशी आरोपीने धमकी दिली होती.
