पुणे : पुणे इसिस मॉड्युल प्रकरणी एक मोठी अपडेट समोर आली आहे. या प्रकरणी पुणे पोलिसांच्या (Pune News) ताब्यातून पळून गेलेल्या दहशतवाद्याला अटक करण्यात आली आहे. राष्ट्रीय तपास यंत्रणेकडून (एनआयए) त्याला अटक केली गेली आहे. पुणे इसिस मॉड्युल प्रकरणातील ही आठवी अटक आहे. दहशतवादी शाहनवाज आलम याला झारखंडमधून अटक झाली आहे, तो पुण्यातून पळून गेला होता. स्फोटक बनवण्याचं प्रशिक्षण देणं, ट्रेनिंग कॅम्प आयोजित करणं या प्रकरणांमध्ये तो वॅान्टेड होता.
त्याच्याविरुद्ध दिल्लीत दहशतवादी कृत्य केल्याचा कट रचल्याप्रकरणी गुन्हा दाखल झाला होता. गेल्याच महिन्यात दिल्ली पोलिसांच्या विशेष सेलने त्याला अटक केली होती. त्यानंतर आता एनआयएने पुणे इसिस मॉड्युल प्रकरणात दिल्ली पोलिसांच्या ताब्यातून त्याला अटक केली आहे. जुलै महिन्यात कोथरूड येथे दोन दहशतवाद्यांना अटक करण्यात आली होती. यादरम्यान शाहनवाज आलम हा पुणे पोलिसांना चकमा देऊन फरार झाला होता.
त्याचा अनेक दहशतवादी कारवायांमध्ये सक्रिय सहभाग होता. लपण्याचं ठिकाण शोधण्यापासून शस्त्र चालवण्याचे आणि स्फोटकांचे सराव वर्ग आयोजित करण्यात आलमचा सहभाग होता. पुण्यातून फरार झालेल्या मोस्ट वॅान्टेड दहशतवादी आलमला महिनाभरापूर्वी दिल्ली पोलिसांनी अटक केली. एनआयएने या दहशतवाद्यावर तीन लाख रुपयांचे बक्षीसदेखील ठेवले होते. दहशतवादी शाहनवाज आलम हा इंजिनिअर आहे.
