नाशिक : नाशिकमध्ये एक धक्कादायक घटना घडली आहे. यामध्ये दोन मित्रांना अपघातामध्ये जीव गमवावा लागला आहे. जेवणासाठी हॉटेलच्या शोधात निघालेल्या 3 मित्रांच्या दुचाकीची एसटी बसला धडक बसून भीषण अपघात (Accident) झाला. या अपघातामध्ये दोन जणांचा जागीच मृत्यू झाला आहे तर एकजण गंभीर जखमी झाला आहे.
काय घडले नेमके ?
शुभम प्रशांत सोनवणे (21, रा. व्हीआयपी कॉलनी, भुसावळ) (Shubham Prashant Sonwane) व शुभम संतोष कोकाटे (Shubham Santosh Kokate) (21, रा. महाराणा प्रताप चौक, सिडको) अशी या अपघातात मृत पावलेल्या तरुणांची नावे आहेत तर जयेश अरुण महाजन (21, रा. म्हसवड, ता. जि. जळगाव) (Jayesh Arun Mahajan) असे जखमी झालेल्या विद्यार्थ्याचे नाव आहे. हे तिघेही नाशिक येथील संदीप फाऊंडेशन या महाविद्यालयात अभियांत्रिकीचे शिक्षण घेत होते. हे तिघेही एकाच दुचाकीवरून मध्यरात्री दोन वाजताच्या सुमारास दुचाकीवरून भरधाव वेगात सिडकोतून त्र्यंबक रोडकडे येत होते.
यादरम्यान ते जिल्हा रुग्णालया जवळ आले असता राज्य मार्ग परिवहन महामंडळाच्या धावत्या बसच्या टूलबॉक्सवर पाठीमागून जाऊन आदळले. ही धडक एवढी भीषण होती कि यामध्ये दोघांचा जागीच मृत्यू झाला. या अपघाताची माहिती मिळताच सरकार वाडा पोलीस ठाण्याचे पोलीस अधिकारी आणि कर्मचारी तातडीने घटनास्थळी दाखल झाले. त्यांनी घटनास्थळाचा पंचनामा करून गुन्हा दाखल केला आहे.
