नाशिक : राज्यात अपघाताचे प्रमाण काही थांबायचे नाव घेईना. अशीच एक अपघाताची घटना नाशिकमध्ये घडली आहे. नाशिकच्या नांदगाव-मालेगाव मार्गावर हा भीषण अपघात ( Accident) झाला आहे. नांदगाव -मालेगाव मार्गावर (Nandgaon – Malegaon road) नाग्या – साक्या धरणाच्या (Nagya – Sakya Dam0 पुलावरून कार कोसळून हा भीषण अपघात झाला आहे. या अपघातात एका लहान बालिकेसह 3 जणांचा जागीच मृत्यू झाला आहे तर 7 जण जखमी झाले आहेत.
काय घडले नेमके?
हे सर्वजण मालेगाव येथील असून जालन्याला लग्न सोहळ्यासाठी गेले होते. लग्न सोहळा आटपून मालेगावकडे परतत असताना मध्यरात्रीच्या सुमारास हा अपघात झाला. या अपघातामध्ये जखमी झालेल्यांना शासकीय रुग्णालयात दाखल करण्यात आले आहे. दुर्दैवाने या अपघातात एका लहान बालिकेसह 3 जणांचा जागीच मृत्यू झाला.
या अपघाताची माहिती मिळताच पोलीस तातडीने घटनास्थळी दाखल झाले. त्यांनी जखमींना हॉस्पिटलमध्ये दाखल केले तर चार जणांचे मृतदेह ताब्यात घेऊन ते शवविच्छेदनासाठी पाठवले. हा अपघात नेमका कशामुळे झाला हे मात्र अद्याप समजू शकलेले नाही. पोलीस या अपघाताचा पुढील तपास करत आहेत.