नांदेड : नांदेडमध्ये (Nanded News) एक धक्कादायक घटना घडली आहे. यामध्ये दोन दिवसांपासून बेपत्ता असलेल्या तरुणाचा मृतदेह आढळून आला आहे. शेतातील विहिरीत त्याचा मृतदेह आढळल्याने संपूर्ण जिल्ह्यात खळबळ उडाली आहे. नायगाव तालुक्यातील टाकळगाव या ठिकाणी ही घटना घडली आहे. योगेश गिरी असे मृत विद्यार्थ्याचे नाव असून तो परभणी जिल्ह्यात वैद्यकीय शिक्षण घेत होता. योगेशची हत्या झाली की त्याने आत्महत्या केली? याची सर्वत्र चर्चा रंगू लागली आहे.
काय घडले नेमके?
मृत योगेश गिरी हा परभणी जिल्ह्यातील पूर्णा येथील आयुर्वेदिक महाविद्यालयात बी. ए. एम. एसचे शिक्षण घेत होता. चार दिवसांपूर्वी तो आपल्या गावी टाकळगाव येथे आला होता. रविवारी तो कोणाला काहीही न सांगता अचानक घरातून निघून गेला. सुरुवातीला योगेश हा मित्राकडे गेला असावा असे त्याच्या कुटुंबियांना वाटले मात्र सायंकाळपर्यंत तो घरी परतलाच नाही. रात्री उशिरापर्यंत योगेश हा घरी परत न आल्याने कुटुंबियांची धाकधूक वाढली. मित्र तसेच नातेवाईकांकडे शोध घेतला, पण त्याचा काही शोध लागला नाही.
यानंतर मंगळवारी सकाळी परिसरातील नागरिकांना योगेशचा मृतदेह शेतातील विहिरीत तरंगताना आढळून आला. या घटनेची माहिती मिळताच नायगाव पोलिसांनी घटनास्थळी धाव घेतली. मात्र या प्रकरणी अद्याप कोणावरही गुन्हा दाखल करण्यात आला नाही. या घटनेमुळे गिरी कुटुंबावर दुःखाचा डोंगर कोसळला आहे. डॉक्टर होण्याचे स्वप्न पाहणाऱ्या तरुणाचा असा अंत झाल्याने सगळीकडे हळहळ व्यक्त केली जात आहे.