नाशिक : मित्रांसोबत आठवडाभरापूर्वी पार्टीला गेलेल्या युवकाचा तीक्ष्ण हत्याराने वार करून खून केल्याचा धक्कादायक प्रकार नाशिक शहरात (Nashik News) उघडकीस आला आहे. हा युवक आठवडाभरापासून बेपत्ता होता. शिवारात सोमवारी दुपारच्या सुमारास जनावरांना चारण्यासाठी गोदाकाठी घेऊन जाणाऱ्या गुराख्याला पंचक शिवारा जवळ उग्र वास आला. त्याने तात्काळ सतर्कता दाखवत गावकऱ्यांच्या मदतीने पोलिसांना ही माहिती कळवली. पोलिसांनी घटनास्थळी धाव घेत मृतदेहाचा पंचनामा करून शवविच्छेदनसाठी पाठवला त्यानंतर निर्घृण खून झाल्याचं समोर आले आहे. याप्रकरणी नाशिक रोड पोलिस ठाण्यात गुन्हा दाखल करण्याचे काम सुरू होते.
काय आहे संपूर्ण प्रकरण?
आठ दिवसांपूर्वी जेल रोड येथील पंचक येथे राहणारा ज्ञानेश्वर शिवाजी गायकवाड (वय 30) हा विवाहित युवक मित्रांसोबत पार्टीसाठी गेला होता. पण, तो पुन्हा घरी परतलाच नाही म्हणून पत्नीने बेपत्ता झाल्याची तक्रार नाशिक रोड पोलिस ठाण्यात केली होती. पोलिस युवकाचा तपास करत असतानाच काल गोदाकाठी आगार टाकळी परिसरात मलनिस्सारण केंद्राजवळ छिन्न-विच्छिन्न अवस्थेत त्याचा मृतदेह आढळून आला. मृतदेहाचा पंचनामा केला असता छातीवर खोल जखमा आढळून आल्या, तसेच त्याच्या चेहऱ्यावर सिमेंट सदृश्य पावडर देखील टाकण्यात आल्याचे समजत आहे.
या घटनेमुळे परिसरात मोठ्या प्रमाणात खळबळ उडाली आहे. दरम्यान, हा खून अनैतिक संबंधातून झाला असल्याचे समजत आहे. याप्रकरणी नाशिकरोड पोलिसांनी खून झालेल्या युवकाच्या पत्नीला आणि तिच्या प्रियकराला संशयावरून ताब्यात घेतले असून त्यांची कसून चौकशी सुरू आहे. या प्रकरणी इतर दोन-तीन व्यक्तींना सुद्धा चौकशीसाठी बोलविण्यात आले आहे. या प्रकरणाचा पुढील तपास नाशिक रोड पोलिस करत आहेत. मृत ज्ञानेश्वर मोल मजुरी करून आपल्या कुटुंबाचा उदरनिर्वाह करत होता.
