नांदेड : मराठा आरक्षणावरून (Maratha Reservation) राज्याचे वातावरण तापले आहे. मराठा आरक्षणापायी आज नांदेडमध्ये दुसरा बळी गेला आहे. नायगाव तालुक्यातील भोपळा येथील शालेय विद्यार्थ्याने जीवन संपवले आहे. दहावीत शिकणारा 17 वर्षीय ओमकार बावणे याने विहीरीत उडी घेउन आत्महत्या केली. शिक्षणासाठी फी भरण्याची ऐपत नाही, मराठा समाजाला आरक्षण मिळावे यासाठी आत्महत्या करत असल्याची सुसाईट नोट लिहून त्याने आत्महत्या केली आहे. यामुळे नांदेड जिल्ह्यात खळबळ उडाली आहे.
मराठा समाजाला आरक्षण मिळावे यासाठी आज नांदेड जिल्ह्यात एकाच दिवशी दोन बळी गेले. काल पहाटे हदगाव तालुक्यातील वडगाव तेथील 24 वर्षीय तरुण शुभम पवार याने विष पिऊन आत्महत्या केली होती. आज रात्री शुभमच्या पार्थिवावर अंत्य संस्कार करण्यात आले. शुभमच्या चितेची आग थंड होण्यापूर्वी आणखी एकाने नांदेडमध्ये आत्महत्या केली. नांदेड जिल्ह्यातील नायगाव तालुक्यातील भोपळा येथे एका शालेय विद्यार्थ्यांने विहिरीत उडी घेऊन आत्महत्या केली. इयत्ता दहावीत शिकणाऱ्या 17 वर्षीय ओमकार बावने याने विहीरीत उडी घेउन आत्महत्या केली.
मृत्यूपूर्वी लिहिली चिट्ठी
आत्महत्या करण्यापूर्वी विहिरीवर लिहून ठेवलेल्या चिठ्ठीमध्ये माझे आई वडील मोल मजुरी करून आम्हाला शिक्षण शिकवत होते. पण त्यांची परिस्थिती मला पाहवत नव्हती. आणि मराठा समाजाला आरक्षण मिळत नसल्याने मी विहिरीत उडी मारून जीव देत आहे, असं त्याने चिठ्ठीत लिहिलं आहे. या प्रकरणी रामतीर्थ पोलिसांत आकस्मिक मृत्यूची नोंद करण्यात आली आहे. यामुळे नांदेड जिल्हात मराठा आरक्षण आंदोलन चिघळण्याची शक्यता वर्तवली जात आहे.