ठाणे : श्रद्धा वालकरच्या हत्याकांडापेक्षाही भयंकर हत्याकांड हे मीरा रोडमध्ये (Mira Road Murder Case) घडलं आहे. या घटनेमुळे संपूर्ण महाराष्ट्र हादरला आहे. मनोज सानेने त्याची लिव्ह इन पार्टनर सरस्वतीची हत्या केली. त्यानंतर तिच्या मृतदेहाचे असंख्य तुकडे केले. काही तुकडे शिजवले, काही भाजले तर काहींची विल्हेवाट लावली. या प्रकरणी पोलिसांनी आरोपी मनोज सानेला (Manoj Sane) अटक केली आहे. या हत्या प्रकरणात आता रोज नवनवीन खुलासे होताना दिसत आहेत.
आरोपी मनोज साने याने सरस्वतीच्या मृतदेहाची विल्हेवाट लावण्यासाठी गुगलचा आधार घेतल्याची माहिती समोर आली आहे. याव्यतिरिक्त तो चौकशीदरम्यान वेगवेगळी माहिती देत पोलिसांची दिशाभूल करत आहे. आता या प्रकरणी त्यांचे नातेवाईक समोर येताना दिसत आहेत. आरोपी मनोज याने याआधी दोघेही अनाथ असल्याची माहिती पोलिसांना दिली होती. मात्र, मनोजचे काका व इतर नातेवाईक बोरिवली परिसरात राहत असल्याचे समोर आले आहे. सरस्वतीलाही पाच बहिणी असून त्यातील एक बहीण आता पोलिसांसमोर आली आहे.
या दोघांनी सरस्वतीच्या (Saraswati) घरी जाऊन जेवणही केले होते. आरोपीने प्रथम आपण लिव्ह इन रिलेशनमध्ये राहत असल्याचे सांगितले होते. मात्र, दोघांनी एका मंदिरात विवाह केल्याची माहितीदेखील आरोपीने पोलिसांना दिली आहे. या दोघांची ओळख सन २०१२मध्ये सरस्वती नोकरीच्या शोधात असताना, बोरिवली परिसरात झाली होती. त्याअगोदर सरस्वती तिच्या बहिणीकडे राहायला होती. तत्पूर्वी ती अहमदनगर येथील आपटे अनाथ आश्रमात राहायला होती. आरोपी आणि मृत महिला दोघेही मूळचे अहमदनगरचे असल्याने त्यांच्यात जवळीक निर्माण झाली होती. मनोज पोलिसांना रोज वेगवेगळ्या पद्धतीची माहिती देत आहे मात्र त्याने सरस्वतीची हत्या केल्याची कबुली अद्यापही दिलेली नाही.