नांदेड : नांदेडमध्ये (Nanded) शुक्रवारी सकाळच्या सुमारास एक अपघाताची घटना घडली होती. यामध्ये मॉर्निंग वॉकसाठी (Morning Walk) गेलेल्या एका 62 वर्षीय व्यक्तीचा कारच्या धडकेत मृत्यू झाला होता.हदगाव तालुक्यातील मनाठा या ठिकाणी हा अपघात झाला होता. या प्रकरणी पोलिसांनी तपास केला असता एक धक्कादायक माहिती समोर आली. हा अपघात घडला नसून हा अपघात घडवण्यात आला होता. आणि हा अपघात (Accident) घडवण्यामागे मृत व्यक्तीच्या लहान भावाचा हात आहे. जुन्या वादातून लहान भावानेच आपल्या मुलांच्या मदतीने मोठ्या अपघात घडवून आणला आहे. या प्रकरणी मनाठा पोलिसांनी (Manatha Police) मृताचा भाऊ आणि तीन पुतण्यासह सात जणांविरोधात खुनाचा गुन्हा (Crime) दाखल केला आहे.
काय आहे नेमके प्रकरण?
मृत उत्तम शिंदे (Uttam Shinde) आणि त्यांचा सख्खा लहान भाऊ मारोती शिंदे (Maroti Shinde) यांच्यात मागच्या काही वर्षांपासून शेती आणि संस्थेचा वाद सुरू होता. यामुळे अनेकवेळा त्यांच्यात नेहमी वाद व्हायचे. यादरम्यान 2 जूनला उत्तम शिंदे हे आपल्या मित्रासोबत मॉर्निंग वॉकसाठी गेले होते. मनाठा येथील रमेश बोईनवाड यांच्या आखाड्याजवळ येताच त्यांना कारने धडक दिली. या अपघातात गंभीर जखमी झाले आणि त्यांचा मृत्यू झाला.
यानंतर हा अपघात नसून घातपात आहे. जुना वाद मनात ठेवून आणि कट कारस्थान रचून आरोपींनी हा अपघात घडवून आणला आणि उत्तम शिंदे यांचा खून केला, असा आरोप मृत उत्तम शिंदे यांच्या मुलाने केला आहे. तसेच आरोपी विरोधात जोपर्यंत खुनाचा गुन्हा दाखल होणार नाही तोपर्यंत अंत्यविधी करणार नाही, असा पावित्रादेखील मृत उत्तम शिंदे यांच्या नातेवाईकांनी घेतला.
यानंतर मनाठा पोलिसांनी विशाल शिंदे (Vishal Shinde) यांच्या तक्रारीवरून मृताचा भाऊ मारोतराव शिंदे, पुतण्या सुहास शिंदे, अमोल शिंदे, संदीप शिंदे यांच्यासह शेजारी असलेले संजय नारायण बल्लाळ, शुभम बल्लाळ, सौरभ बल्लाळ यांच्या विरोधात खुनाचा गुन्हा दाखल केला. शुल्लक कारणातून सख्ख्या भावानेच भावाचा काटा काढल्याने मनाठा गावामध्ये मोठी खळबळ उडाली आहे. सहायक पोलीस निरीक्षक संतोषी शेकडे (Assistant Police Inspector Santoshi Shekde) या प्रकरणाचा पुढील तपास करत आहेत.
