सातारा- मायणी येथील मृत व्यक्तीची बनावट कागदपत्रे तयार करून फसवणूक केल्याच्या गुन्ह्यात भाजपचे जिल्हाध्यक्ष आणि माण-खटावचे आमदार जयकुमार गोरे यांना उच्च न्यायालयानं दणका दिला असून आज झालेल्या सुनावणीमध्ये जयकुमार गोरे यांना अंतरिम दिलासा देण्यास नकार दिला आहे.
तसेच याचिकाकर्त्याला संबंधित कागदपत्र सादर करण्याचे निर्देश देत सुनावणी १७ मेपर्यंत तहकूब केली आहे.
त्यामुळे आता आमदार गोरे यांना अटक होण्याची शक्यता वर्तवली जात आहे उच्च न्यायालयात राज्य सरकारने आमदार गोरे यांच्या जामीनाला जोरदार विरोध केला. यापूर्वी आमदार गोरे यांचा वडुज सत्र न्यायालयानेही अटकपूर्व जामिनासाठी फेटाळला आहे. त्यामुळे आता गोरे यांच्या डोक्यावर अटकेची टांगती तलवार कायम आहे.
काय आहे प्रकरण ?
महादेव पिराजी भिसे यांनी याप्रकरणी तक्रार केली आहे. मायणी येथील छत्रपती शिवाजी महाराज एज्युकेशनच्या जागेत जाण्यासाठी गट नंबर 769 मधील अल्पभूधारक शेतकरी, जो मयत आहे, त्याला जिवंत दाखवून जमिनीचा दस्तावेज केला गेला. त्यातून अल्पभूधारक कुटुंबाची फसवणूक केली गेली, असा आरोप जयकुमार गोरेंवर आहे.
