नागपूर : नागपूरमध्ये (Nagpur) एक धक्कादायक घटना उघडकीस आली आहे. यामध्ये एका क्षणात संपूर्ण कुटुंब उध्वस्त झाले आहे. यामध्ये क्रिकेट सट्ट्याच्या (Cricket Betting) नादात मोठ्या प्रमाणात रक्कम हरल्यामुळे आर्थिक फटका बसलेल्या एका 20 वर्षीय तरुणाने नैराश्यातून (depression) आत्महत्या (Suicide) केली आहे. यादरम्यान मुलाच्या मृत्यूची बातमी एकताच त्याचे आईने देखील काही तासात विष पिऊन आपल्या आयुष्याचा शेवट केला आहे.
काय घडले नेमके?
खितेन नरेश वाधवानी (वय 20 वर्ष) (Khiten Naresh Wadhwani) असे मृत मुलाचे नाव आहे तर दिव्या नरेश वाधवानी (Divya Naresh Wadhwani) असे त्याच्या आईचे नाव आहे. खितेन हा नागपुरातील नामांकित महाविद्यालयाचा विद्यार्थी होता. परंतु चुकीच्या संगतीमुळे तो क्रिकेट सट्ट्याकडे वळला. त्याने यावर्षी आपल्या मित्रांच्या सांगण्यावरून आयपीएल सट्ट्यावर पैसे लावू लागला. मात्र यामध्ये त्याला मोठा आर्थिक फटका बसला आणि तो नैराश्यात गेला.
घटनेच्या दिवशी शनिवारी (20 मे) खितेन मध्यरात्री उशिरा घरी पोहोचला, त्यामुळे त्याची आई त्याच्यावर चिडली होती. या घटनेच्या दुसऱ्या दिवशी संपूर्ण कुटुंब शहरातील आशीर्वाद नगर इथे नातेवाईकाच्या घरी लग्न समारंभासाठी गेले होते. यावेळी खितेनने घरी कोण नसल्याचा फायदा घेत घरातील स्वयंपाकघरात गळफास घेऊन आत्महत्या केली. यानंतर त्याचे कुटुंबीय जेव्हा घरी परतले तेव्हा खितेनचा मृतदेह स्वयंपाकघरात लटकलेल्या अवस्थेत आढळून आला. यानंतर त्याला तातडीने रुग्णालयात दाखल केले असता त्याला मृत घोषित करण्यात आले. आणखी एक धक्कादायक बाब म्हणजे आपल्या तरुण मुलाच्या मृत्यूच्या 48 तासांनंतर खितेनच्या आईनेदेखील विष पिऊन आपल्या आयुष्याचा शेवट केला आहे.