यवतमाळ : यवतमाळमध्ये (Yavatmal News) दुहेरी हत्याकांडाची घटना घडली आहे. या घटनेमुळे (Yavatmal News) संपूर्ण यवतमाळ हादरलं आहे. यवतमाळच्या खानगाव शिवारातील सज्जनगड मठाचे प्रमुख लक्ष्मण शेंडे उर्फ चरणदास महाराज आणि त्यांच्या सेवेकरी पुष्पा होले यांचे मृतदेह मठात आढळले आहेत. या घटनेमुळं परिसरात एकच खळबळ उडाली आहे. पोलीस या प्रकरणाचा पुढील तपास करत आहेत.
काय घडले नेमके?
या दोघांचे मृतदेह ते वास्तव्यास असलेल्या ठिकाणी आढळून आले आहेत. तसेच घरातील साहित्य अस्ताव्यस्त स्थितीत आढळले होते. तसंच, दोघांच्या मृतदेहावर कोणत्याही मारहाणीच्या खुणा आढळल्या नसल्याने या प्रकरणाचे गुढ अधिक वाढले आहे. तसंच, संशयास्पद स्थितीत मृतदेह आढळल्याने पोलिसही चक्रावले आहेत. गेल्या कित्येक वर्षांपासून दोघेही मठात वास्तव्यास होते.
चरणदास महाराज हे जडीबुटी देऊन आजारी व्यक्तींवर उपचार करत होते. त्यांच्या उपचारांमुळं अनेकांना गुण आल्याचे सांगण्यात येते. त्यामुळं त्यांच्यावर विश्वास ठेवणारे आणि त्यांना मानणारे अनेक जण होते. त्यामुळं त्यांच्या मृत्यूने एकच खळबळ उडाली आहे. हि हत्या चोरीच्या उद्देशाने झाली असल्याचा संशय पोलिसांनी व्यक्त केला आहे. श्वान पथक, ठसेतज्ज्ञ आदींना पाचारण करुन या प्रकरणाचा पुढील तपास करण्यात येत आहे.
