धुळे : धुळे जिल्ह्यातील शिरपूर तालुक्यातील जवखेडा या ठिकाणी एक धक्कादायक घटना घडली आहे. यामध्ये नुकतीच पोलीस भरतीची परीक्षा दिलेल्या एका विद्यार्थीनीने तापी नदीत उडी घेऊन आपल्या आयुष्याचा शेवट केला आहे. शिवानी बाळु पाटील (वय 19) (Shivani Balu Patil) असे आत्महत्या करणाऱ्या तरुणीचे नाव आहे. तिने काल गिधाडे येथील तापी नदीपात्रात उडी घेऊन आत्महत्या केली. मृत शिवानीने नुकतीच पोलीस भरतीची परिक्षा दिली होती. मात्र तिने नेमकी कोणत्या कारणातून आत्महत्या केली हे अद्याप समजू शकलेले नाही.
काय घडले नेमके?
जवखेडा येथील शिवानी पाटील ही तरुणी सकाळी घरून परीक्षेला जाते असे सांगून शिरपूरला गेली होती. मात्र, परिक्षेला न जाता ती थेट गिधाडे गावाजवळील तापी नदीच्या पात्रजवळ गेली आणि त्या ठिकाणी तिने नदीच्या पात्रात उडी घेऊन आत्महत्या केली. तापी नदीपात्रात उडी घेतल्यानंतर काही लोकांनी तिला बुडताना पाहिले. यानंतर त्यांनी तातडीने नदीत उडी घेऊन शिवानीला पाण्याबाहेर काढले. त्यानंतर तिला त्वरित शिरपूर उपजिल्हा रुग्णालयात दाखल करण्यात आले. मात्र तोपर्यंत तिचा मृत्यू झाला होता.
शिवानी घटनेच्या दिवशी सकाळी 9 वाजता जवखेडा येथून परीक्षा देण्यासाठी जात असल्याचे सांगुन गेली होती. मात्र ती परीक्षा केंदावर न जाता गिधाडे येथील तापी नदीपात्रावर गेली आणि त्या ठिकाणी तिने नदीत उडी घेऊन आत्महत्या केली. तिने नेमकी कोणत्या कारणामुळे आत्महत्या केली हे मात्र अद्याप समजू शकलेले नाही. शिरपूर पोलिस (Shirpur Police) या प्रकरणाचा अधिक तपास करत आहेत.