कोंढव्यात बॉम्ब बनवण्याचे प्रशिक्षण; दहशतवादी वास्तव्यास असलेली इमारत एनआयएने केली जप्त
गेल्या काही दिवसात राष्ट्रीय तपास यंत्रणेने (एनआयए) पुणे शहर आणि जवळपासच्या भागात अनेक दहशतवाद विरोधी कारवाया केलेल्या आहेत. यातच आता एनआयए ने दहशतवाद्यी कारवायांसाठी वापर करण्यात आलेली इमारत आणि इतर तीन मालमत्ता एनआयए ने जप्त केल्या आहेत. याच परिसरात दहशतवादी वास्तव्यास होते यादरम्यान त्यांनी बॉम्ब बनवण्याचे प्रशिक्षण देखील घेतले असल्याचे तपासात समोर झाले आहे. हे दहशतवादी आयसीस या दहशतवादी संघटनेशी संबंधित असून महाराष्ट्र आणि गुजरात मध्ये बॉम्बस्फोट करण्याच्या तयारीत होते, असे तपासात उघड झाले आहे.
दहशतवादी कारवायांच्या आरोपावरून राष्ट्रीय तपास यंत्रणेने (एनआयए) मोहम्मद शहानाझ आलम, रिजवान अली, अब्दुलाह शेख, तलाह लियाकत खान, मोहम्मद इम्रान मोहम्मद युसुफ खान उर्फ अमीर अब्दुल हमिद खान, मोहम्मद युनुस मोहम्मद याकुब साकी उर्फ अदिल सलीम खान, कादीर दस्तगिर पठाण उर्फ अब्दुल कादीर, समीब नासीरउद्दीन काझी, जुल्फीकार अली बडोदवाला उर्फ सईफ, शमिल साकिब नाचन आणि आकिफ अतिक नाचन यांना अटक केली. हे सर्व दहशतवादी कोंडव्यात राहून दहशतवादी कारवाया करण्यासाठीचे प्रशिक्षण घेत असल्याचे समोर आले आहे. महाराष्ट्र आणि गुजरात मधील विविध ठिकाणी बॉम्बस्फोट करण्याचे षडयंत्र दहशतवाद्यांनी रचले होते हे तपासात उघड झाले आहे. या दहशतवाद्यांनी सातारा जिल्ह्यातील एका कपड्याच्या दुकानात दरोडा टाकून बॉम्बस्फोटाचे साहित्य खरेदी केले होते. तसेच साताऱ्यातील जंगल सदृश्य भागात या बॉम्बस्फोटांसाठीचे प्रात्यक्षिक केल्याचेही समोर येत आहे. या प्रकरणाचा अधिक तपास एनआयए करत आहे.