सातारा : राज्यात अपघाताचे प्रमाण वाढतच चालले आहे. सातारा (Satara News) जिल्ह्यातील खटाव तालुक्यातील भुरकवडी रस्त्यावर कारीचा मळा शिवारात जाधव वस्तीच्या लवणालगत एसटी बस आणि दुचाकीची समोरासमोर धडक होऊन भीषण अपघात झाला. या अपघातात दुचाकीस्वार गणेश तानाजी काटकर (38) याचा जागीच मृत्यू झाला. तर यात 15 प्रवाशी जखमी झाले आहेत. एसटी चालकाच्या हलगर्जीपणामुळे हा अपघात झाला आहे.
काय घडले नेमके?
खटाव – भुरकवडी रस्त्यावर कारीचा मळा शिवारात जाधव वस्तीच्या लवणालगत सायंकाळी 5 वाजण्याच्या सुमारास हा भीषण अपघात झाला. खटावकडून वडूजकडे निघालेली पुणे स्टेशन-वडूज ही एसटी बस (एमएच 06 एस 8175) आणि वडूजकडून खटावकडे निघालेला दुचाकीस्वार (यूके 05 ए 5559) या दोघांमध्ये समोरासमोर भीषण धडक झाली. या धडकेत दुचाकीस्वार गणेश तानाजी काटकर (रा. कुकुडवाड, ता. माण) याचा जागीच मृत्यू झाला. ही धडक एवढी भीषण होती कि धडकेनंतर एसटी बस पाणी वाहत असलेल्या पाटावरून पलिकडच्या पोपट जाधव यांच्या घराशेजारच्या झाडावर जाऊन आदळली.
या अपघातात बसच्या केबीनचे मोठ्या प्रमाणात नुकसान झाले आहे. बसच्या काचा निखळून पडल्या. यावेळी जाधव कुटुंबातील सदस्यांनी बसच्या चालकाला केबीनमधून बाहेर काढले. तर वडूज येथील प्राथमिक शिक्षक अमोल ढगे, सागर माने तसेच बारामती येथील आरसी ग्रुपचे रोहन चव्हाण, बाळाभाऊ जाधव, भारत चावले, पारस बाबर, अभी खराडे, सौरभ नांदुगुडे, लखन सकट यांनी जखमींना बसमधून बाहेर काढले. जखमींना तातडीने रुग्णवाहिकेतून वडूज येथील शासकीय रुग्णालयात दाखल करण्यात आले. या घटनेची माहिती मिळताच पुसेगाव पोलीस ठाण्याचे पथक तातडीने घटनास्थळी दाखल झाले.