मुंबई : सध्या एक मोठी बातमी समोर आली आहे. यामध्ये दोन कोटी रुपयांचं बक्षीस असलेल्या उच्चशिक्षित जहाल माओवादी नेत्याला (Maoists News) तेलंगणामधून अटक करण्यात आली आहे. संजय राव उर्फ दीपक असं या माओवाद्याचं नाव आहे. दरम्यान संजयची पत्नीही माओवादी असून तिलासुद्धा बंगळूरूमधून अटक करण्यात आली आहे. तिच्यावर पन्नास लाखांचं बक्षीस होतं.
संजय हा उच्चशिक्षित आहे. त्याने बीटेकपर्यंत शिक्षण घेतलं आहे. तो गेल्या तीस वर्षांपासून माओवादी चळवळीत सक्रिय आहे. तो माओवाद्यांच्या केंद्रीय समितीचा सदस्य देखील आहे. त्याला तेलंगणा पोलिसांकडून अटक करण्यात आली आहे. त्याची माहिती देणाऱ्याला महाराष्ट्रात पन्नास लाखांचं तर इतर राज्यात मिळून दोन कोटींचं बक्षीस जाहीर करण्यात आलं होतं.
संजयविषयी थोडक्यात माहिती
संजय हा महाराष्ट्रातल्या अंबरनाथ येथील मूळ रहिवासी असून, त्याने कश्मीरमध्ये बीटेकचं शिक्षण घेतले. यानंतर तो महाराष्ट्रात परतला. त्यानंतर तो माओवादी चळवळीत सक्रिय झाला. महाराष्ट्रासह काही राज्यात त्याच्यावर गंभीर गुन्हे दाखल आहेत. पुणे जिल्ह्यात तळेगाव दाभाडे येथे 2015 मध्ये पोलिसांनी टाकलेल्या धाडीमध्ये 3 जणांना अटक करण्यात आली होती. त्यावेळी संजय पोलिसांना चकवा देऊन तिकडून निसटला होता. सध्या संजयकडे कोकणासह पश्चिम घाटात माओवादी चळवळ मजबूत करण्याची जबाबदारी देण्यात आली होती. तो पश्चिम घाट विशेष क्षेञ समितीचा सदस्य आहे. अखेर त्याला अटक करण्यात पोलिसांना यश आलं आहे.
