मुंबई : मुंबईतील खारदांडा (Khardanda) परिसरात आज सकाळी एक धक्कादायक घटना घडली आहे. यामध्ये खारदांडा येथील एका बेकरीत गॅस गळती (Gas leak) झाली.यानंतर अचानक त्या ठिकाणी आग लागली. ही आग एवढी भीषण होती कि, या आगीमध्ये 6 जण होरपळले आहेत. या 6 जणांना रुग्णालयात दाखल करण्यात आलं असून त्यांची प्रकृती चिंताजनक आहे. या 6 जणांमध्ये 2 लहान मुलांचादेखील समावेश आहे. या आगीमुळे बेकरीचे मोठ्या प्रमाणात नुकसान झाले आहे. या आगीवर नियंत्रण मिळवण्यात अग्निशमन दलाला यश आले आहे.
काय आहे नेमके प्रकरण?
खारदांडा येथील गोविंद पाटील मार्गावर हरिश्चंद्र बेकरी (Harishchandra Bakery) आहे. या बेकरीत सकाळी 9 च्या सुमारास अचानक गॅस गळती झाली. त्यानंतर आगीचा भडका उडाला. ही आग एवढी भीषण होती कि या आगीत (Fire) बेकरीमधील सहाजण होरपळले. या सहा जणांना आगीतून बाहेर पडणं मुश्किल झालं. त्यामुळे हे सहाही जण आगीत होरपळले. त्यांना तातडीने वांद्रे भाभा रुग्णालयात (Bandra Bhabha Hospital) दाखल करण्यात आले असून त्यांची प्रकृती अत्यंत चिंताजनक आहे. या 6 जणांमध्ये 2 लहान मुलांचादेखील समावेश आहे.
आगीची माहिती मिळताच बीएमसी, एमएफबी, पोलीस, अदानी आणि अग्निशमन दलाचे पथक तातडीने घटनास्थळी दाखल झाले. यानंतर या कर्मचाऱ्यांनी आगीवर नियंत्रण आणलं आणि जखमींना तातडीने बेकरीतून बाहेर काढत त्यांना जवळच्या रुग्णालयात दाखल केलं. या आगीत होरपळलेल्या सर्व जणांवर आयसीयूमध्ये उपचार सुरू आहेत. हे सर्व जण 6 ते 65 वर्षाचे आहेत. हे सर्वजण 40 ते 51 टक्के भाजले आहेत. जखमींमध्ये तीन महिला आणि तीन पुरुषांचा समावेश आहे.