अकोला : अकोला (Akola News) शहरातून एक धक्कादायक बातमी समोर आली आहे. यामध्ये (Akola News) जुने शहर पोलीस स्टेशनच्या हद्दीत गीता नगर पोलीस स्टेशनच्या हद्दीत एक महिला पोलीस कर्मचारी गळफास घेतलेल्या अवस्थेत आढळून आली. गीता नगरमधील एका अपार्टमेंटमधील राहत्या घरात त्यांचा मृतदेह आढळून आला. वृषाली दादाराव स्वर्गे (वय 35) असे आत्महत्या करणाऱ्या महिला पोलीस कर्मचाऱ्याचे नाव आहे. या घटनेमुळे परिसरात एकच खळबळ उडाली आहे.
काय घडले नेमके?
वृषाली दादाराव स्वर्गे (वय 35) या अकोला शहरातील सिटी कोतवाली पोलीस स्टेशनमध्ये कार्यरत होत्या. काही दिवसांपूर्वी त्यांची बदली झाली होती, त्यानंतर त्यांनी पोलीस अधीक्षक संदीप घुगे यांना विनंती करून बदली थांबवण्यात यावी, असा आग्रह केला. त्यानंतर वृषाली यांना कोतवाली पोलीस ठाण्यात कायम ठेवण्यात आलं. पोलीस दलात ड्युटीवर असताना सर्व काही सुरळीत सुरू होतं. काल 15 ऑगस्ट रोजी झेंडावंदन करण्यासाठी पोलीस ठाण्यात त्या गैरहजर होते. दरम्यान वृषाली जिथे राहायच्या, तिथे शेजारील लोकांना त्यांच्या फ्लॅटमधून दुर्गंधी येऊ लागली. शेजाऱ्यांनी अनेकदा दरवाजाही ठोठावला मात्र आतून कोणताच प्रतिसाद आला नाही. यानंतर शेजारच्यांनी याची माहिती जुने शहर पोलीस स्टेशनमध्ये दिली.
या घटनेची माहिती मिळताच पोलिसांनी वृषाली यांच्या घराचा दरवाजा तोडला आणि आत प्रवेश केला. यावेळी वृषाली या गळफास घेतलेल्या अवस्थेत आढळून आल्या. यानंतर पोलिसांनी घटनास्थळाचा पंचनामा करून मृतदेह शासकीय रुग्णालयात शव विच्छेदनासाठी पाठवला. यानंतर या प्रकरणी आकस्मित मृत्यूची नोंद करण्यात आली.
‘या’ कारणामुळे उचलले टोकाचे पाऊल
वृषाली यांचे पती दादाराव स्वर्गे हे पोलीस दलात कार्यरत होते. 2014 मध्ये दीर्घ आजाराने त्यांचे निधन झाले, त्यानंतर त्यांच्या जागी वृषाली या पोलीस दलात दाखल झाल्या. दरम्यान 2014 पासून वृषाली एकटीच राहायची, लग्नानंतर त्यांना कोणतेही मूलबाळ नव्हतं, त्यात पतीचे निधन झाले. तेव्हापासून त्या नेहमी तणावात राहायच्या. जेव्हा त्यांनी आत्महत्या केली त्यावेळी त्यांनी एक सुसाईड नोटदेखील लिहिली. यामध्ये त्यांनी पतीच्या निधनानंतर आयुष्यात आज एकटी राहिली आहे. त्यात मूल-बाळ पण नाहीये, जगावं तर कोणासाठी? त्यामुळे आज माझ्या इच्छेने ‘मी’ आपलं जीवन संपवत आहे, माझ्या मृत्यूला कोणालाही कारणीभूत म्हणजे जबाबदार ठेवू नका, हे सर्व काही स्वतः करीत आहे असे लिहिले आहे.
