अहमदनगर : अहमदनगरमधून (Ahmednagar News) काका आणि पुतणीच्या नात्याला काळिमा फासणारी घटना उघडकीस आली आहे. यामध्ये रात्रीच्या सुमारास बाहेरील तरुणासोबत बोलत असल्याचा राग आल्याने काकाने आपल्या विवाहित पुतणीची हत्या केली आहे. ही धक्कादायक घटना बुधवारी रात्री सव्वाबारा वाजेच्या सुमारास अहमदनगर जिल्ह्यातील कोपरगाव शहरातील खडकी भागामध्ये घडली आहे. या घटनेमुळे शहरात एकच खळबळ उडाली आहे. या प्रकरणी आरोपी काकाविरोधात खुनाचा गुन्हा दाखल करण्यात आला असून शहर पोलिसांनी रात्री घटनास्थळी धाव घेऊन त्याला अटक केली आहे.
काय आहे संपूर्ण प्रकरण?
बुधवारी रात्री त्यांची मुलगी सौ. नेहा संदीप कांबळे (वय 21, हल्ली रा.सप्तशृंगी मंदीराजवळ खडकी, कोपरगाव) ही काही कामासाठी घराबाहेर येऊन एका मुलासोबत बोलत असताना तीचे काका आरोपी संतोष हरीभाऊ आरणे (वय 26, रा.खडकी कोपरगाव) याने बाहेरील मुलासोबत बोलत असल्याच्या कारणावरुन आपल्या मृत पुतणीवर संशय घेतला. त्यानंतर तिला जिवे ठार मारण्याचे उद्देशाने कुऱ्हाडीने तिच्या दोन्ही पायांवर घाव घालून तिला जबर जखमी करुन तिची हत्या केली अशी फिर्याद मृत तरुणीच्या आईने दिली आहे.
मृत नेहा हिच्याशी तिचा काका संतोष याचे गेल्या अनेक वर्षांपासून अनैतिक संबंध होते, अशी माहिती पोलीस निरीक्षक प्रदीप देशमुख यांनी दिली आहे. याबाबत शहर पोलीस ठाण्यात आरोपी संतोष आरणे विरोधात गुन्हा रजिस्टर नंबर 494/23 भारतीय दंड विधान कलम 302 प्रमाणे गुन्हा दाखल करण्यात आला असून घटनेचा पुढील तपास डीवायएसपी संदीप मिटके यांच्या मार्गदर्शनाखाली कोपरगाव शहर पोलीस निरीक्षक प्रदीप देशमुख करत आहेत.