अहमदनगर : अहमदनगरमध्ये (Ahmednagar Crime) एक धक्कादायक घटना उघडकीस आली आहे. यामध्ये अहमदनगरमधील श्रीरामपूर तालुक्यातील एकलहरे-बेलापूर रस्त्यावर मध्यरात्री दरोडा टाकण्यात आला. धक्कादायक बाब म्हणजे दरोडेखोरांनी दरोडा टाकल्यानंतर एकाची ओढणीच्या सहाय्याने हत्या देखील केली आहे. या सगळ्या प्रकारानंतर आरोपींनी घरातील ऐवज घेऊन घटनास्थळावरुन पळ काढला. या घटनेची माहिती मिळताच पोलिसांनी घटनास्थळी धाव घेऊन तपासाला सुरुवात केली आहे.
काय घडले नेमके?
श्रीरामपूरच्या एकलहरे-बेलापूर रस्त्यावर मध्यरात्री दोन वाजताच्या सुमारास हा सशस्त्र दरोडा टाकण्यात आला. दरोडेखोरांनी घरात घुसून एका विवाहित युवकाची ओढणीच्या सहाय्याने गळा आवळून हत्या केली आहे. नईम पठाण असे 33 वर्षीय मृत तरुणाचे नाव आहे. मृत नईमची पत्नी रात्री लघुशंकेला घराबाहेर आली असता त्या ठिकाणी दबा धरून बसलेल्या पाच दरोडेखोरांनी तिला फरफटत घरात आणून जबर मारहाण करण्यास सुरुवात केली. आरडाओरडा होताच, दरोडेखोर घरात आल्याचे नईमच्या लक्षात आले. मात्र काही करायच्या आतच दरोडेखोरांनी नईमला घरातील लहान बाळांच्या झोक्यासाठी बांधलेल्या ओढणीने गळफास दिला आणि त्याची निर्घृणपणे हत्या केली.
यानंतर या दरोडेखोरांनी घटनास्थळावरून सात लाख रुपये आणि सोने-चांदी असा ऐवज लंपास केला. धक्कादायक म्हणजे या आरोपी दरोडेखोरांमध्ये एका महिलेचादेखील समावेश आहे. या घटनेची माहिती मिळताच तात्काळ अप्पर पोलीस अधीक्षक स्वाती भोर, पोलीस निरीक्षक हर्षवर्धन गवळी यांनी घटनास्थळी धाव घेत दरोड्याच्या तपास सुरू केला.