अकोला : अकोला (Akola News) जिल्ह्यातून एक धक्कादायक बातमी समोर आली आहे. यामध्ये (Akola News) पातुर तालुक्यातील चान्नी पोलीस स्टेशन हद्दीतील दिग्रस बु.या ठिकाणी एका महिलेने आत्महत्या केल्याची घटना घडली होती. ही घटना 11 ऑगस्ट रोजी दुपारी घडली होती. सारिका विकास गवई (वय 27) असे मृत विवाहित महिलेचे नाव आहे. आता सारिकाच्या मृत्यूचा अहवाल समोर आला आहे. आधी सारिकाचा गळा आवळून खून करण्यात आला, त्यानंतर आत्महत्याचा बनाव रचल्याचं वैद्यकीय अहवालात समोर आलं आहे. याप्रकरणी पोलिसांनी पतीला अटक करून तिघांविरुद्ध गुन्हे दाखल केले आहेत.
काय घडले नेमके?
11 ऑगस्ट रोजी पातुर तालुक्यातील दिग्रस गावातील सारिका विकास गवई या विवाहित महिलेने राहत्या घरी गळफास घेऊन आत्महत्या केली होती. अशी माहिती तिच्या पतीने चान्नी पोलिसांना दिली. या घटनेची माहिती मिळताच पोलिसांनी घटनास्थळी धाव घेऊन मृतदेहाचा पंचनामा केला व मृतदेह वैद्यकीय तपासणीसाठी अकोल्याच्या शासकीय रुग्णालयात पाठविला. यानंतर या प्रकरणी चान्नी पोलिसांनी आकस्मिक मृत्यूची नोंद केली. यादरम्यान आता मृतदेहाच्या वैद्यकीय तपासणीचा अहवाल प्राप्त झाला.
शवविच्छेदन अहवालात धक्कादायक माहिती समोर
या अहवालात विवाहितेची गळा आवळून हत्या केल्याचं समोर आलं. त्यानंतर पोलिसांनी हत्येच्या दिशेनं तपास सुरू केला. तपासादरम्यान नातेवाईकांनी दिलेल्या फिर्यादीनुसार पोलिसांना तिच्या पतीवर संशय झाला अन् त्यांनी पतीला चौकशीसाठी ताब्यात घेतले. यानंतर पोलिसांनी त्याची अधिक चौकशी केली असता त्याने आपला गुन्हा मान्य केला आहे. या प्रकरणी पोलिसांनी सैनिक पती विकास जगन्नाथ गवई (वय 36), दीर सुहास जगन्नाथ गवई (वय 33), सासरे जगन्नाथ दौलत गवई (वय 65) या तिघांविरुद्ध हत्येचा गुन्हा दाखल केला आहे. या प्रकरणाचा पुढील तपास पोलीस उपनिरीक्षक गणेश महाजन करत आहेत.