नवी मुंबई : नवी मुंबईमध्ये (Navi Mumbai News) एक धक्कादायक घटना घडली आहे. यामध्ये डॉक्टरांची परिषद सुरू असतानाच हृदयविकाराचा तीव्र झटका आल्याने नवी मुंबईतील एका नामवंत डॉक्टराचे निधन झाले. ही घटना शुक्रवारी नेरूळ येथे घडली. या परिषदेला 25 हून अधिक नामांकित डॉक्टर उपस्थित होते. मात्र कोणालाच त्यांचा जीव वाचवता आला नाही. यामुळं सगळीकडे हळहळ व्यक्त केली जात आहे.
काय घडले नेमके?
नेरूळ येथील हॉटेलमध्ये डॉक्टरांसाठी अद्ययावत ज्ञान उपक्रमांतर्गत डी. वाय. पाटील रुग्णालयातील छाती व श्वसनरोग विभागाचे प्रमुख डॉ. अभय उप्पे यांनी मार्गदर्शन केले. त्यानंतर त्यांना अस्वस्थ वाटू लागल्याने, ते परिषदेमधून घरी जाण्यासाठी निघाले. परंतु हॉटेलच्या लिफ्टजवळ आल्यानंतर, छातीत जोरदार कळ आल्याने ते जमिनीवर कोसळले. याची माहिती मिळताच उपस्थित डॉक्टरांनी लिफ्टजवळ धाव घेतली.
यानंतर डॉ. अभय उप्पे यांना सीपीआर देण्यात आला. उपस्थित डॉक्टरांनी ताबडतोब कार्डियाक अ‍ॅम्ब्युलन्स बोलावून घेतली. डॉ. उप्पे यांना रुग्णवाहिकेत ठेवून उपचार सुरू करण्यात आले. ही रुग्णवाहिका अपोलो रुग्णालयात चेस्ट फिजिशियन, कार्डिओलॉजिस्ट यांनी त्यांना वाचवण्याचे अतोनात प्रयत्न केले मात्र त्यांचा अपयश आले. नामवंत डॉक्टरांच्या उपस्थितीत होत असलेल्या वैद्यकीय परिषदेतच नामवंत डॉक्टरने जीव गमावल्याने सगळीकडे हळहळ व्यक्त केली जात आहे.
