नाशिक : नाशिकमध्ये (Nashik News) एक मन हेलावून टाकणारी घटना उघडकीस आली आहे. यामध्ये आपल्या मुलास शाळेतून दुचाकीवरून घरी घेऊन येत असताना उड्डाणपुलावरील खड्डे चुकविण्याच्या प्रयत्नात आईच्या डोळ्यांदेखत पोटच्या गोळ्याला आपला जीव गमवावा लागला आहे. यामध्ये पाठीमागून आलेल्या आयशर ट्रकने धडक दिल्याने दुभाजकावर पडून आईसमोरच तिच्या 10 वर्षीय लेकाचा करुण अंत झाला आहे. गुरुवारी सकाळी साडेअकराच्या सुमारास सिन्नर फाटा या ठिकाणी ही धक्कादायक घटना घडली आहे.
वरद गणेश चिखले असे या अपघातात मृत्युमुखी पडलेल्या शालेय विद्यार्थ्याचे नाव असून, या अपघातात त्याची आई संगीता चिखले यादेखील जखमी झाल्या आहेत. या अपघातानंतर स्थानिक नागरिकांकडून पालिकेच्या या असंवेदनशील कारभारावर प्रचंड संताप व्यक्त करण्यात आला. पोलिस नाईक अनिल पवार यांनी या अपघातप्रकरणी नाशिकरोड पोलिस ठाण्यात दिलेल्या फिर्यादीवरून आयशर ट्रक (एमएच 14 एलबी 0726) चालक अहमद पटेल (रा. कुरकुंडी, पोस्ट घारगाव, ता. संगमनेर) याला ताब्यात घेऊन त्याच्याविरोधात गुन्हा दाखल करण्यात आला.
कसा घडला अपघात?
वरद हा शहर पोलिस दलातील कर्मचारी गणेश चिखले (रा. चेहेडी पंपिंग स्टेशन) यांचा लहान मुलगा होता. तो जेलरोड येथील के. एन. केला शाळेत पाचवीत शिक्षण घेत होता. त्याचा गुरुवारी पेपर होता. पेपर झाल्यावर त्याची आई संगीता चिखले या त्याला शाळेतून घरी घेऊन येत होत्या. उड्डाणपुलावरील सिन्नर फाटा बाजूकडील उतारावर त्यांच्या दुचाकीला पाठीमागून आयशर ट्रकने धडक दिली. त्यामुळे संगीता चिखले या दुचाकीसह दुभाजकावर पडल्या. या अपघातात मायलेक जखमी झाले. वरदच्या पायांसह डोक्याला गंभीर दुखापत झाल्याने त्याला स्थानिक नागरिकांनी त्वरित सिन्नर फाटा येथील खासगी रुग्णालयात दाखल केले. मात्र, डोक्याला गंभीर इजा झाल्याने त्याचा मृत्यू झाला. या घटनेमुळे सगळीकडे हळहळ व्यक्त केली जात आहे.