जव्हार : मोखाडा तालुक्यातील सायदे ग्रामपंचायतीमधील (Sayde Gram Panchayat) बोरीची वाडी (Borichi Wadi) या ठिकाणी एक धक्कादायक घटना घडली आहे. यामध्ये एका सात वर्षांच्या चिमुकलीला सर्पदंशामुळे (Snake bite) आपला जीव गमवावा लागला आहे. डॉक्टरांच्या हलगर्जीपणामुळे या चिमुकलीला आपला जीव गमवावा लागला असा आरोप या मुलीच्या कुटुंबियांकडून करण्यात आला आहे.
काय घडले नेमके?
छाया सखाराम भोई (वय 7) (Chhaya Sakharam Bhoi) असे मृत चिमुकलीचे नाव आहे. ती मंगळवारी संध्याकाळी अंगणात खेळत होती. खेळत असतानाच तिला सर्पदंश झाला. ही घटना तिच्या वडिलांना कळतात त्यांनी तिला तातडीने खोडाळा प्राथमिक आरोग्य केंद्रात (Khodala Primary Health Centre) दाखल केले. तासाभराच्या कालावधीनंतर तेथील डॉक्टरांनी तिला सर्पदंश झालेला नाही, तर खेळत असताना दुखापत झाल्याचे सांगितले. यानंतर तिला घरी घेऊन जाण्यास सांगण्यात आले.
यानंतर तिच्या वडिलांनी तिला घरी नेले. त्यानंतर काही वेळाने तिची तब्येत खालावल्याने तिला पुन्हा खोडाळा प्राथमिक आरोग्य केंद्रात आणण्यात आले. यावेळी उपस्थित डॉक्टरने सांगितले की तिला तत्काळ मोखाडा ग्रामीण रुग्णालयात दाखल करा, इथे तिच्यावर उपचार होणार नाहीत. यादरम्यान मोखाड्याकडे नेत असताना अर्ध्या वाटेत या चिमुकलीचा मृत्यू झाला. यानंतर माझ्या मुलीच्या मृत्यूला खोडाळा प्राथमिक आरोग्य केंद्राचे डॉक्टरच जबाबदार आहेत, असा आरोप मुलीच्या वडिलांनी केला आहे.