जळगाव : जळगावमध्ये (Jalgaon) एक धक्कादायक घटना उघडकीस आली आहे. यामध्ये जळगाव शहरातील सुप्रीम कॉलनीमध्ये राहणाऱ्या एका 19 वर्षीय तरुणाने आज सकाळी राहत्या घरात दोरीने गळफास घेऊन आपल्या आयुष्याचा शेवट (Sucide) केला आहे. ही घटना सोमवारी सकाळी 11 सुमारास उघडकीस आली आहे. आकाश सुरेश शेरे (वय-19 रा. सुप्रीम कॉलनी, जळगाव) (Akash Suresh Shere) असे आत्महत्या करणाऱ्या तरुणाचे नाव आहे. त्याने नेमकी कोणत्या कारणामुळे आत्महत्या केली हे मात्र अद्याप समजू शकलेले नाही.
काय आहे संपूर्ण प्रकरण?
जळगावातील सुप्रीम कॉलनीत आकाश शेरे हा आपली आई आणि लहान भाऊ दीपक यांच्यासोबत राहत होता. आकाश हा एमआयडीसी परिसरात चहाची टपरी चालवून आपल्या कुटुंबाचा उदरनिर्वाह करत होता. नेहमीप्रमाणे आकाशने आपल्या आईला सकाळी 6 वाजता आईला चहाच्या टपरीवर सोडून तो परत घरी अंघोळ करण्यासाठी गेला. यानंतर त्याने राहत्या घरी गळफास घेऊन आत्महत्या केली.
अशाप्रकारे आले उघडकीस
आकाश हा टपरीवर का आला नाही म्हणून आई सविता या त्याला पाहण्यासाठी घरी आल्या. तेव्हा त्यांना आकाशाचा मृतदेह गळफास घेतलेल्या अवस्थेमध्ये आढळून आला. यानंतर आपल्या मुलाला या अवस्थेमध्ये पाहून आईने हंबरडा फोडला. आईने आरडाओरड केल्यानंतर शेजाऱ्यांनी घटनास्थळी धाव घेऊन आकाशला तातडीने जिल्हा शासकीय वैद्यकीय महाविद्यालयात दाखल केले. या ठिकाणी वैद्यकीय अधिकारी डॉ. नम्रता अच्छा (Medical Officer Dr.Namrata Aachhya) यांनी आकाशला तपासून मृत घोषित केले. मृत आकाश याच्या पश्चात आई सविता, भाऊ दीपक आणि दोन विवाहित बहीण असा परिवार आहे. या प्रकरणी एमआयडीसी पोलीस (Midc Police) ठाण्यात अकस्मात मृत्यूची नोंद करून पुढील तपासाला सुरुवात करण्यात आली आहे.