पुणे : पाकिस्तानला गोपनीय माहिती पुरविल्याच्या आरोपावरून दहशतवादविरोधी पथकाने (एटीएस) अटक केलेले संरक्षण संशोधन आणि विकास संस्थेचे (डीआरडीओ) संचालक आणि वरिष्ठ शास्त्रज्ञ डॉ. प्रदीप कुरुलकर यांना आज एटीएसच्या पथकाकडून पुण्यातील न्यायालयात हजर करण्यात आले. त्यांच्याकडून आतापर्यंत करण्यात आलेल्या तपासात मिळालेली माहिती एटीएसकडून न्यायालयात सादर करण्यात आली. विशेष न्यायालयाने त्यांना मंगळवारपर्यंत एटीएस कोठडीत ठेवण्याचा आदेश दिला होता.
त्यानंतर आज त्यांना न्यायालयात हजर करण्यात आले. या प्रकरणी विशेष न्यायालयाने प्रदीप कुरुलकरला 15 मे पर्यंत ATS कोठडी सुनावण्यात आली आहे. डीआरडीओचे संचालक डॉ. प्रदीप कुरुलकर हे पाकिस्तानच्या इंटेलिजन्सच्या हनी ट्रॅपमध्ये अडकले होते. त्यानंतर पाकिस्तानच्या इंटेलिजन्स ऑपरेशनमध्ये सहभागी होऊन त्यांनी पाकिस्तानला माहिती पुरवल्याचा धक्कादायक प्रकार समोर आला. यामुळे आता दहशतवादी विरोधी पथकाने संचालकावर मोठी कारवाई केली होती. हनीट्रॅपमध्ये अडकून त्यांनी संवेदनशील माहिती पाक इंटेलिजन्स ॲाफिसरला दिल्याचं स्पष्ट झालं आहे. निवृत्तीला सहा महिने राहिले असताना ते हनीट्रॅपमध्ये फसले आहेत.