Sugar Price Today : सध्या देशभरात साखरेच्या दरात मोठी वाढ झाली आहे. केंद्र सरकारच्या आकडेवारीनुसार, 20 जुलैला किरकोळ बाजारात साखर 48.18 रुपये किलो होती, तीच साखर 20 ऑगस्टला 55.70 रुपये किलो झाली आहे. म्हणजे एका महिन्यात 7.50 रुपयांची वाढ. महाराष्ट्रातील कोल्हापूर बाजारात घाऊक भाव 4,716 रुपये क्विंटलवर पोहोचला आहे, हा आतापर्यंतचा उच्चांक आहे. किरकोळ बाजारात आजची परिस्थिती पाहिली तर राष्ट्रीय सरासरी भाव 58.23 रुपये आहे. ओडिशामध्ये सर्वात जास्त 64.72 रुपये किलो, तर दिल्ली, केरळ, मध्यप्रदेशमध्ये 60 रुपयांच्या पुढे भाव गेला आहे. पुणे-मुंबईत सध्या चांगली साखर 56 ते 60 रुपये किलोने विकली जात आहे.
सरकारने सांगितले आहे की साखर महाग होण्यामागे इथेनॉल नाही तर 5 वेगळी कारणे आहेत.
1. उत्पादनात घट: यंदा सुरुवातीला 343 लाख टन साखर उत्पादनाचा अंदाज होता, पण आता तो 306 लाख टनांवर आला आहे. ऊसावर लाल कुजव्या (Red Rot) आणि शेंडा पोखरणाऱ्या अळीचा रोग आला आहे.
2. सणासुदीची मागणी: ऑगस्ट ते नोव्हेंबरमध्ये गणेशोत्सव, दसरा, दिवाळी असल्याने मिठाई, बिस्कीट कंपन्यांची मागणी 30% ने वाढते.
3. हवामानाचा फटका: जास्त पाऊस आणि पाणी साचल्याने ऊस पिकाचे नुकसान झाले आहे.
4. जागतिक टंचाई: जगातही साखरेचा तुटवडा आहे. 2026-27 मध्ये 33 लाख टनांची जागतिक टंचाई राहणार आहे.
5. साठेबाजी: काही कारखाने आणि व्यापारी मुद्दाम साठा रोखून धरत आहेत, जेणेकरून भाव आणखी वाढतील, असे सरकारचे म्हणणे आहे.
आजच्या घडीला देशातील साखर साठा गेल्या 30 वर्षातील सर्वात कमी आहे. 1 ऑक्टोबरला नवीन गाळप हंगाम सुरु होताना फक्त 35 लाख टन साठा शिल्लक राहील, जो गरजेपेक्षा खूप कमी आहे. सरकारने आता मोठ्या ग्राहकांवर 15 दिवसांपेक्षा जास्त साठा न करण्याची मर्यादा घातली आहे आणि कच्च्या साखरेची आयात शुल्कमुक्त केली आहे. पुढील 6 महिन्यांचा अंदाज असा आहे की, सप्टेंबर ते नोव्हेंबरपर्यंत भाव तेजीतच राहतील, 60-65 रुपयांपर्यंत जाऊ शकतात. पण नोव्हेंबरमध्ये नवीन ऊस गाळप सुरु झाल्यावर डिसेंबर-जानेवारीपासून भाव पुन्हा 48-52 रुपयांपर्यंत स्थिर होतील. त्यामुळे सणासुदीच्या काळात सर्वसामान्यांना महागाईचा फटका सहन करावा लागणार आहे.