पर्यटन विशेष : गुजरातमधील स्टॅच्यू ऑफ युनिटी हा जगातील सर्वात उंच पुतळा आहे. सरदार वल्लभभाई पटेल यांचा हा पुतळा 182 मीटर उंच आहे. दरवर्षी लाखो पर्यटक येथे भेट देतात. पुतळ्यासोबतच येथील जंगल सफारी, धरण आणि फुलांची दरी हे सुद्धा पाहण्यासारखे आहे. तुम्ही पुण्यातून जायचा विचार करत असाल तर ही संपूर्ण माहिती तुमच्यासाठी आहे.
पुण्यातून अंतर किती आणि कसे जायचे -
पुण्यापासून केवडिया म्हणजेच स्टॅच्यू ऑफ युनिटी हे अंतर सुमारे 650 ते 700 किलोमीटर आहे.
1. ट्रेनने कसे जायचे - हा सर्वात सोपा आणि स्वस्त मार्ग आहे. पुण्याहून थेट केवडियाला ट्रेन नाही. तुम्हाला पुण्याहून वडोदरा किंवा भरूचला जावे लागेल. पुण्याहून वडोदराला दररोज अनेक ट्रेन आहेत. वडोदरापासून केवडियाला जाण्यासाठी दररोज 4 ते 5 मेमू ट्रेन चालतात, अंतर फक्त 90 किलोमीटर आहे आणि 2 तासात तुम्ही केवडिया स्टेशनवर पोहोचता. केवडिया स्टेशन अगदी पुतळ्यापासून 5 किलोमीटरवर आहे.
2. बसने कसे जायचे - पुण्यातून वडोदराला प्रायव्हेट स्लीपर बस आहेत. वडोदरा एसटी स्टँडवरून केवडियाला दर अर्ध्या तासाने सरकारी बस मिळते. तिकीट 100 ते 150 रुपये आहे.
3. स्वतःच्या गाडीने - पुणे मुंबई महामार्गाने वडोदरा आणि तिथून केवडिया असा रस्ता आहे. साधारण 12 ते 13 तास लागतात.
तिथे काय काय पाहायचे -
1. स्टॅच्यू ऑफ युनिटी - पुतळ्याच्या आत लिफ्ट आहे जी तुम्हाला 135 मीटर उंचीवरील गॅलरीत घेऊन जाते. तिथून संपूर्ण नर्मदा नदी आणि सरदार सरोवर धरणाचा विहंगम नजारा दिसतो. संध्याकाळी 7 वाजता लेझर लाईट आणि साऊंड शो होतो तो नक्की पहा.
2. जंगल सफारी - पुतळ्यापासून 2 किलोमीटरवर आहे. याला स्टॅच्यू ऑफ युनिटी जंगल सफारी असे म्हणतात. 375 एकर परिसरात हा विस्तारला आहे. येथे भारतातील आणि परदेशातील 1000 पेक्षा जास्त प्राणी आणि पक्षी आहेत. वाघ, सिंह, बिबट्या, हत्ती, गेंडा, जिराफ पाहायला मिळतात. ओपन जिप्सी मधून सफारी करता येते. फोटोग्राफीसाठी हे ठिकाण फारच सुंदर आहे.
3. सरदार सरोवर धरण आणि व्हॅली ऑफ फ्लॉवर्स - धरणाच्या बाजूला फुलांची दरी बनवली आहे जिथे रंगीबेरंगी फुले आहेत, फोटो काढण्यासाठी बेस्ट आहे. तिथे नौका विहार सुद्धा करता येतो.
तिकीट किती आहे -
स्टॅच्यू ऑफ युनिटीचे बेसिक तिकीट 150 रुपये आहे. गॅलरीसह तिकीट 380 रुपये आहे. जंगल सफारीचे तिकीट 200 रुपये प्रौढांसाठी आणि लहान मुलांसाठी 125 रुपये आहे. सर्व ठिकाणांसाठी एकत्र कॉम्बो पॅक घ्यायचा असेल तर 1000 ते 1200 रुपयांमध्ये मिळतो. ऑनलाईन बुकिंग http://sountickets.in या अधिकृत वेबसाईटवरून करता येते.
राहण्याची आणि खाण्याची सोय -
गुजरात सरकारने केवडिया येथे टेंट सिटी 1 आणि टेंट सिटी 2 बनवली आहे. येथे एसी तंबूमध्ये राहण्याची सोय आहे, एका दिवसाचे भाडे 3500 ते 5000 रुपयांपासून सुरू होते, त्यात सकाळचा नाश्ता आणि रात्रीचे जेवण समाविष्ट असते. याशिवाय बजेटमध्ये राहायचे असेल तर वडोदरा येथे 1000 रुपयांमध्ये चांगली हॉटेल मिळतात. खाण्यासाठी तिथे गुजराती थाळी प्रसिद्ध आहे, पुतळा परिसरातच फूड कोर्ट आहे जिथे सर्व प्रकारचे जेवण मिळते.
कधी जावे - ऑक्टोबर ते मार्च हा सर्वात चांगला काळ आहे. पावसाळ्यात धरणातून पाणी सोडल्याचा नजारा पाहायला मिळतो.
एका दिवसात पुतळा, जंगल सफारी आणि धरण हे सर्व आरामात पाहून होते, त्यामुळे पुण्यातून दोन दिवसाचा प्लॅन केला तरी पुरेसा आहे.